Dýrt verður það

Sjálfstæðisflokkurinn verður þjóðinni dýrkeyptur áður en yfir lýkur. Hagstjórn a la Hannes Hólmsteinn, óhæfir embættismenn og ráðherrar sem sofa á verðinum - þingmenn sem kyngja hverju sem er. Eiginhagsmunagæsla, valdapot, spilling og siðleysi.

Árni Mathiesen hefur sjálfsagt haldið að hinn breski starfsbróðir hafi bara hringt til að heyra hvernig gengi og sýna vandamálum Íslendinga áhuga. Það er eins og hann hafi ekki hugleitt það að orð hans gætu orðið svo afdrifarík og dýr. Svo segir maðurinn ekki einu sinni af sér!

Nú er svo unnið með hraði að sameiningu BYR, SPRON og SPKEF. Ríkið ætlar að leggja 20 miljarða af almannafé í þann gjörning en Árni fjármálaráðherra er einn af eigendum BYR, sjá hér. Lesið endilega það sem Gunnar Axel skrifar um þessar svikamyllur.

Vissi ekki um tilboð Breta vegna Landsbankans

Den tid, den sorg

Þá vitum við það - Geir hefur tvo kosti og báða slæma. Annars vegar að fara gegn vilja 90% þjóðarinnar, samstarfsflokksins í ríkisstjórn, Heimdalls, verkalýðsfélaganna og fl. Hins vegar að Davíð fari aftur í framboð.

Hann hlýtur að meta það svo að Sjálfstæðisflokkurinn klofni í tvo eða jafnvel fleiri hluta og að það sé það versta sem gæti gerst. Þannig lætur hann hagsmuni flokksins ganga fyrir hagsmunum fólksins í landinu.

En er þetta annars ekki dæmigert fyrir Davíð - viðtal í Fyens Stiftstiende!? Eins og svo oft áður lætur hann orðin berast manna á milli vitandi að þau rata alltaf rétta leið. Nú ef hann gerir alvöru úr hótun sinni þá verður það bara "Den tid, den sorg".

 

Davíð: „Þá mun ég snúa aftur"

VG hlustar ekki á kjósendur sína

Steingrímur og fleiri áhrifamenn innan VG telja sig þess umkomna að hafa vit fyrir kjósendum sínum. Líkt og í gamla Alþýðubandalaginu telja þeir sig vera "raddir fólksins" en eru í raun ekki í ýkja góðu sambandi við fólkið sjálft. Þeir skella skollaeyrum við því að töluverður meirihluti kjósenda þeirra er jákvæður fyrir inngöngu í ESB og finna þess í stað sambandinu allt til foráttu. Ekki er upplýstri umræðu heldur fyrir að fara á þeim bæ frekar en í hópi Sjálfstæðismanna.

Sjálfur tel ég að umhverfismálin séu sumum hjá VG ekki hjartans mál. Það á þó alls ekki við alla þingmenn flokksins. Sá grunur minn að þeim dreymi í raun um ríkisstjórnarsamstarf með heimastjórnararmi Sjálfstæðisflokksins að vitbættum einhverjum flóttamönnum úr Framsóknarflokknum (Kristilegi þjóðarflokkurinn?) er vonandi ekki á rökum reistur. Það hefur þó vakið mikla athygli hvað Steingrímur J. hefur algjörlega forðast að tala illa um Davíð Oddsson að undanförnu þó svo að ærin ástæða hafi verið til.

VG ættu að minnast þess hvernig skoðanakannanir sýndu þau skjótast upp snemma á árinu 2007 en falla aftur í sama farið þegar nær dró kosningum. Flokkurinn virðist því miður alltaf toppa á vitlausum tíma.

Segir vaxandi andúð í garð Evrópusambandsins innan VG

Ó fyrir framan

Dálítið kyndugt er að sjá óvinsælasta ráðherra óvinsællar ríkisstjórnar með þjóðargjaldþrot á samviskunni tjá sig um að mótmælum almennings þurfi að stilla í hóf.

Að óvinsældir Sjálfstæðisflokksins séu í sögulegu hámarki virðist ekki valda honum miklum áhyggjum enda óvíst að Árni reyni að framlengja eigið dauðastríð í stjórnmálum.

Þarf að stilla mótmælum í hóf

Farið hefur flón betra

Það þarf greinilega að spúla skrifstofu útvarpsstjóra svo og þeirra yfirmanna sem stjórnmálaflokkarnir hafa í mörgum tilfellum tekið þátt í að troða þarna inn. Sumir þeirra gera lítið annað en að flækjast fyrir og þiggja fúlgur fjár fyrir. 11 æðstu stjórnendur RÚV fengu að meðaltali 850 þúsund í laun á mánuði fyrir síðasta uppgjörsár og fæstir þeirra koma nálægt dagskrárgerð stofnunarinnar nema með afskiptasemi og almennum leiðindum.

Fólk áttar sig ef til vill ekki á því að nýlegar sparnaðaraðgerðir munu hafa mjög mikil neikvæð áhrif á dagskrá RÚV. Af 44 mönnum sem missa starf og verkefni vinna flestir við dagskárgerð, bæði sem fréttamenn, tæknimenn og í leikmyndadeild. Vinnuálagið var mjög mikið fyrir. Þeir sem helst mega missa sín sitja hins vegar enn sem fastast.

10 milljónum of mikið - fyrir hvað?

Það er rétt að benda á að þetta fólk sem hefur 848.484 kr. að meðaltali í mánaðarlaun kemur lítið sem ekkert beint að dagskrárgerð. Sparnaðaraðgerðir ættu fyrst að beinast að þeim sem mest fá í sinn hlut áður en farið er að segja upp hinu sauðtrygga og vel meinandi starfsfólki sem ber hag stofnunarinnar fyrir brjósti. Ég geri það að tillögu minni að starfsmenn RÚV taki sig saman og undirriti vantraust á yfirstjórn stofnunarinnar, útvarpsstjóra og ráðherra menntamála.

Árslaun útvarpsstjóra 18 milljónir

Byrjað öfugu megin

Jeppalingur útvarpsstjóra er að vísu svartur og myndin samsett, en var ekki byrjað á vitlausum enda í niðurskurðinum eins og venjulega? Mánaðarlegar afborganir RÚV ohf af þessu farartæki eru líklega á við laun eins fréttamanns.

Í boði Bláu krumlunnar

Enn er Sjálfstæðisflokkurinn að þrengja að RÚV - núna á að segja upp 44 starfsmönnum (verktakar eru að sjálfsögðu taldir með) en örugglega engum stjórnendum. Frumvarp menntamálaráðherra sem hefur óhjákvæmilegan niðurskurð í för með sér hefur enn ekki verið sent þingflokkunum en samt er búið að tilkynna um niðurskurðinn meðal starfsmanna RÚV - til hvers halda alþingismenn eiginlega að þeir séu?

Alþingi hefur afhent framkvæmdavaldinu alræðisvald og er í raun orðinn kjaftaklúbbur af síðustu sort. Af hverju er þingmennska ekki bara gerð að hlutastarfi - einn dag í viku til að samþykkja frumvörpin sem ráðherrarnir afhenda? Það myndi eflaust sparast milljarður þar eða tveir. Best væri að loka búllunni og opna þar götueldhús.

Útvarpsstjóri þiggur þreföld þingmannalaun fyrir það hlutskipti sitt að vera málaliði "Bláu krumlunnar". Heyrst hefur að hann muni lækka um 10% í launum ásamt öðrum æðstu yfirmönnum RÚV en af hverju er aldrei hagrætt með því að fækka yfirmönnum? Öðrum starfsmönnum er fækkað og munu margir þurfa að taka á sig umtalsverðar launalækkanir.

Ætlar Sjálfstæðisflokkurinn ekki að hætta fyrr en öllu hefur verið komið í þrot?

700 milljóna sparnaður hjá RÚV

Í boði Flokksins

Ég ætla nú rétt að vona að Katrín mæti aftur næsta laugardag og fylgi ræðunni eftir.

Annars finnst mér þessar kvartanir nema við HR vera þeim til skammar. Hvað nú ef einhver þeirra sjálfra hefði haldið innblásna ræðu á fjölmennum fundi fyrir ári síðan þar sem nýfrjálshyggja hefði verið umræðuefnið? Eru þetta eintómir plebbar sem ekki þurfa að leggja mikið á sig í náminu til að fá öruggt starf á vegum Flokksins?

Óánægð með ræðu á heimasíðu

Boðorðin 10

Ég þykist fullviss um að mikil eftirspurn sé eftir nýju stjórnmálaafli. Þó svo að ég vilji gjarnan sníða málefnaskrá slíkrar hreyfingar að öllum mínum persónulegu skoðunum þá býst ég ekki við að það sé vænlegt til árangurs. Hins vegar gat ég ekki stillt mig um að setja niður nokkur grunnmarkmið eða boðorð sem hljóta að falla vel að hinu "Nýja Íslandi".

1. Pólitískar stöðuveitingar eiga ekki að líðast - Það er ólíðandi að stjórnmálaflokkar komi útsendurum sínum fyrir í lykilstöðum, embættum, stjórnum, nefndum og í fjölmiðlum. Af þeim sökum er færasta fólkið oft og iðulega sniðgengið af því að það er ekki með (rétt) flokksskýrteini í vasanum eða vill stunda sín störf án tengsla við stjórnmálaflokkana.

2. Fjármál stjórnmálaflokka skulu vera opin til að fyrirbyggja óeðlileg hagsmunatengsl - Ef bókhaldið þolir ekki dagsins ljós hlýtur að vera góð og gild ástæða fyrir því. Það þarf að vera hafið yfir allan vafa að stjórnmálaflokkar og einstakir stjórnmálamenn gangi ekki erinda stuðningsaðila og fjársterkra bakhjarla.

3. Gæta skal jafnvægis á milli kynja á listum og þegar skipað er í embætti og nefndir - Ætti að vera sjálfgefið á 21. öldinni en treglega hefur gengið að ná fullu jafnræði, ekki síst með tilliti til launa. Einnig hefur berlega komið í ljós að áhættusækni karla þarf nauðsynlegt mótvægi sem áhættufælni kvenna veitir.

4. Efla skal þingræði og sjálfstæða ákvarðanatöku þingmanna - Þeim ber að kynna sér málin eftir bestu getu og láta eigin sannfæringu ráða. Flokksagi má ekki taka völdin og gera einstaka þingmenn að viljalausum verkfærum. Stjórnarmeirihluti verður að láta af þeim leiða ósið að valta sífellt yfir minnihlutann. Minnihlutastjórn á að geta verið raunhæfur möguleiki.

5. Aðskilja skal framkvæmdavald, löggjafarvald og dómsvald - Ráðherrar eiga að starfa utan þings og skilyrðislaust að vera valdir með menntun, reynslu og hæfni að leiðarljósi. Dómara skal tilnefna samkvæmt hæfnismati dómsnefndar en ekki hentisemi einstakra ráðherra eða pólitískra afla. (Byggja á hugmyndum Vilmundar Gylfasonar).

6. Hagsmunir þjóðarinnar skulu ætíð ganga fyrir hagsmunum stjórnmálaflokkanna - Það má aldrei slá mikilvægum ákvörðunum á frest vegna þess að þær séu umdeildar innan stjórnmálaflokks. Umræða þarf að geta átt sér stað á Alþingi þó svo að landsfundir einstakra flokka hafi ekki tekið afstöðu til málsins.

7. Stjórnmálamönnum og stjórnendum ríkisstofnana ber að axla ábyrgð á mistökum sínum - Það er fáheyrt að íslenskir embættis- eða stjórnmálamenn segi sig frá störfum ef þeir eru uppvísir af misnotkun, spillingu eða alvarlegum mistökum. Nauðsynlegt er að auka siðgæðisvitund meðal þeirra.

8. Eftirlitsstofnanir skulu starfa óháð stjórnmálaflokkum - Það verður að vera hafið yfir allan vafa að eftirlitsstofnanir geti gegnt skyldum sínum án afskipta stjórnmálamanna. Sama gildir um embætti Ríkissaksóknara, dómstóla, Fjármálaeftirlits, Seðlabanka og rannsóknarnefnda.

9.  Lýðræðishalla verður að rétta af eftir fremsta megni - Efna skal til þjóðaratkvæðagreiðslu um hin stóru mál. Einnig þarf að endurskoða fyrirkomulag kosninga þannig að allir kjósendur njóti jafnræðis (landið eitt kjördæmi) og fái að forgangsraða frambjóðendum af listum, jafnvel í mismunandi stjórnmálaflokkum. Væri ekki réttast að kjósa forsætisráðherra líka?

10. Borgarafundir skulu haldnir reglulega - Það hefur sýnt sig að beint samband á milli þingkjörinna fulltrúa og almennings eykur gagnkvæman skilning. Þó svo að hlutverk fjölmiðla sé mikilvægt og fjölbreytni í fjölmiðlun, þarf rödd fólksins að heyrast miklu oftar en í aðdraganda kosninga.