1 formaður eða 2

Valgerður segir að nýr formaður verði "að kunna að svara erfiðum spurningum fréttamanna". Skyldi fylgja með námskeið í að tala eins og stjórnmálaleiðtogi, að segja ósatt eða tala endalaust um alls ekki neitt? Skyldi nýr formaður þurfa að sverja eið gagnvart flokkeigendaklíkunni sem Bjarni Harðar talaði um? Skyldi nýr formaður verða formaður í heilum flokki eða hálfum? Skyldi hann yfirleitt komast á þing?

Skyldi þjóðin vera tilbúin að láta Framsóknarflokkinn útdeila eftirstandandi eigum sínum til klíkubræðra? Skyldi hún vera sátt við að náttúra landsins verði áfram sprengd og boruð til að útvega fyrirtækjum Framsókarmanna verk á silfurfati? Skyldi hún vera tilbúin að fyrirgefa einkavinavæðingu bankana sem Valgerður sjálf stóð fyrir sem ráðherra bankamála?

Skyldu formannsefnin eiga nóg af jakkafötum?

Flokksþing breytinganna

Fals, blekkingar, samsæri og m****

Ég geri það að tillögu minni að atvinnulausum verði boðin vinna við að rífa þennan turn og að aðstoða íbúa í Túnunum við að dytta að húsum sínum og umhverfi. Einnig ætti að nýta krafta sem flestra til að klára tónlistarhúsið við höfnina, gera upp Lækjartorg og koma skikk á umhverfið okkar. Hvaða heimska er það að láta fólk sitja aðgerðalaust á atvinnuleysisbótum þegar svo mikið verk liggur fyrir? Svo ætti að ákæra borgarstjórnarmeirihlutann fyrir fals, blekkingar, samsæri og fleira þaðan af verra.

Hjálmar Sveinsson á hins vegar mikið hrós skilið fyrir umfjöllun sína í þáttunum Krossgötur á Rás 1.

Táknmynd góðæris eða kreppu

Það eru fleiri sem þurfa á meðferð að halda!

Þó ég óski þess innilega að Ingibjörg Sólrún nái fullum bata sem fyrst verð ég að segja að Samfylkingin getur ekki lengur látið reka á reiðanum með þetta ríkisstjórnarsamstarf.

Í gærkvöldi fengu sjónvarpsáhorfendur að heyra varnaðarorð Robert Wade (sjá hér) sem hefur greinilega betri innsýn inn í þróun efnahagsmála hér á landi en allir helstu ráðamenn okkar samanlagt. Hann sagði hreint út að ríkisstjórnin væri ekki að grípa til þeirra nauðsynlegu aðgerða sem afar brýnt væri að fara í. Björgunarleiðangurinn sem ráðherrarnir hafa svo oft talað um er bæði stefnulaus og fálmkenndur. Við megum víst eiga von á því að sjá það mun svartara þegar líður á vorið og höfum hreinlega ekki efni á því að hafa biðlund lengur með stjórnvöldum sem virðast tvístígandi og ráðalaus.

Samfylkingarfólk hlýtur að krefjast að þessari ringulreið ljúki strax og að gengið verði til kosninga fljótlega. Neyðarstjórn eða utanþingsstjórn gæti brúað bilið og komið nauðsynlegum málum í höfn, t.d. með ráðgjöf frá Robert Wade, Rober Aliber, reynsluboltum frá Svíþjóð og Finnlandi þar sem kreppan lék þjóðina grátt upp úr 1990.

Hvað þarf mikið til að upp úr sjóði endanlega??? 

Ingibjörg Sólrún lengur frá en áður var talið

Já, ég heyrði það ekki!

Það er auðvelt fyrir Geir að kannast ekki við það sem Robert Wade hélt fram á borgarafundinum í gær, enda þorði forsætisráðherrann ekki að mæta þar og standa fyrir máli sínu. Á fundinum kom eftirfarandi m.a. fram í erindi prófessorsins:

"VAR HRUNIÐ Á ÍSLANDI ÓHJÁKVÆMILEGT, JAFNVEL ÁN EFNAHAGSERFIÐLEIKA Á HEIMSVÍSU? JÁ."

"HEFÐI RÍKISSTJÓRNIN GETAÐ GERT RÁÐSTAFANIR TIL AÐ DRAGA ÚR ÁHRIFUM KREPPUNNAR? JÁ."

Geir þrjóskast hins vegar við að bera ábyrgð á nokkrum sköpuðum hlut og kennir heimskreppunni um ástand mála hér. Vonandi fer þeim fækkandi sem trúa bullinu í honum. Því miður höfum við ærna ástæðu til að óttast að hlutirnir eigi eftir að versna og taka á sig mynd raunverulegrar kreppu. Hvað skyldi Geir vilja segja við okkur þá? Vonandi alls ekki neitt - hann má til með að taka pokann sinn og hverfa á braut.

Kreppan getur dýpkað

Af vettvangi

Ég var þátttakandi í þessum mótmælum í dag og er stoltur að því. Því miður voru þau ekki ýkja fjölmenn - líklega 25-30 manns. Þau gengu út á það að varna ríkisstjórninni inngöngu í Alþingi enda ætti hún að halda sig þar fjarri.

Fyrstur mætti Björgvin Sigurðsson en sneri við þegar hann sá fyrirstöðuna og sá að fólkið myndi ekki víkja. Næst birtust Geir og Þorgerður Katrín og á svipuðum tíma hópur lögreglumanna. Lögreglan bað fólkið um að fara frá en þegar það stóð sem fastast var gripið til þess ráðs að toga í menn og ýta í burtu. Á meðan gafst fólki ágætt svigrúm að koma mótmælum sínum á framfæri. Síðust mætti Þórunn á staðinn og höfðu þá mótmælendur myndað keðju utan um lögregluna sem hrinti þeim frá.

Aðrir ráðherrar fóru inn bakdyramegin til að forðast það að mæta fólkinu augliti til auglitis. Ég ætla að hafa það í huga fyrir næstu kosningar sem verða eflaust með vorinu.

Að lokum vil ég minna fólk á að það fær það sem það á skilið. Ef enginn mótmælir  á þann hátt að skilaboðin komist alla leið verður þjóðin að sætta sig við óbreytt ástand. Ég er ekki hlyntur ofbeldi og skemmdarverkum en tel að borgaraleg óhlýðni sé mjög viðeigandi eins og ástandið er í dag.

Þeir sem ekki voru í Háskólabíói í gær mega alls ekki missa af fundinum þegar hann verður sýndur á RÚV annað kvöld. Hagfræðiprófessorinn Robert Wade sem enginn fulltrúi Sjálfstæðisflokksins þorði að mæta gaf ríkisstjórninni og seðlabankastjóra vægast sagt lélega einkunn. Varnaðarorð hans um það hvað gæti beðið okkar verða líka að ná eyrum fólks.

Mótmælt við Alþingishúsið

Hættið að gert illt verra!

Í guðanna bænum Ingibjörg og Geir, nú er komið nóg. Það gæti mögulega flokkast sem vítavert gáleysi að svo fór sem fór með bankana okkar. Hins vegar er það meðvituð ákvörðun ykkar að sitja enn sem fastast og verja þá embættismenn sem sinntu ekki þeim skyldum sem þeim var treyst fyrir.

 

Þið hafið áður skellt skollaeyrum við ráðleggingum manna eins og Carsten Valgreen og reynt að gera lítið úr faglegri gagnrýni. Látið ykkur þetta að kenningu verða og hættið að gera illt verra! Á að þurfa að bera ykkur út með valdi?

Íslensk stjórnvöld harðlega gagnrýnd

Leikhús fáránleikans

Þetta var mjög sérstakur fundur og einstakur. Grímuklæddur mótmælandi og lögreglustjóri sitjandi hlið við hlið í gömlu leikhúsi, jólasveinn sem setti allt úr skorðum og fundarstjóri sem missti stjórn á skapi sínu. Raunveruleikinn er stundum fáránlegri en nokkur leiksýning. Sem betur fer hélt fundurinn áfram eftir dramatískt augnablik þar sem þó nokkrir gestir (þ.á.m. ég) ruku á dyr. Gunnar má vara sig að láta ekki skapið hlaupa með sig svona í gönur.

Ég spurði Stefán út í ný lög Björns Bjarnasonar um breytingar á hegningarlögum, sjá ágætan pistil um þau hér. Ekki vildi hann meina að neitt af því sem ég nefndi (auknar heimildir til valdbeitingar og forvirkar rannsóknaheimildir) hefði breyst frá fyrri lögum. Mig grunar að það sé ekki alls kostar rétt hjá honum og býst við að Ríkislögreglustjóri muni nýta sér þessar forvirku heimildir mikið á næstunni.

Björn Bjarnason lét ekki sjá sig frekar en fyrri daginn og hefur nú ítrekað sýnt að hann er hugleysingi og raggeit. Eva Hauksdóttir átti ræðu kvöldsins og las lögreglunni pistilinn á áhrifaríkan hátt.

Annars tek ég undir það sem nefnt var oftar en einu sinni á þessum fundi, það verða allir að standa saman í því að koma spillingaröflunum frá. Látum ekki Ástþór Magnússon, Klemenzbræður eða aðrar bullur trufla okkur.

 

Fundi lokið í sátt og samlyndi

Það bítur ekkert á BB

Gamli mótmælandinn Öskur Skarphéðinsson hljómar nú eins og tóm tunna þegar hann lætur út úr sér: "Ég segi eins og Björn Bjarnason dómsmálaráðherra: Ég útiloka ekkert í þeim efnum". Það vekur með manni ónotahroll þegar gamlir róttæklingar eru farnir að vitna í ummæli Björns Bjarnasonar.

Reyndar er það eftirtektarvert hvað BB virðist lítið vilja ræða við fjölmiðla og borgara þessa lands. Á myndbandinu sást hann banda frá sér spurningum fréttamanna og strunsa sína leið. Ekki sá hann heldur ástæðu til að mæta með félögum sínum á borgarafundinn í Háskólabíói fyrir 2 vikum síðan. Hins vegar er hann búinn að leggja fram frumvarp um almenn hegningarlög sem taka á gildi 1. jan. 2009, sjá umfjöllun hér. Þar er m.a. kveðið á um auknar heimildir lögreglu til valdbeitingar og eignaupptöku og það sem kallað er "forvirkar rannsóknarheimildir". Ætli flestir myndu ekki kalla það hleranir eða persónunjósnir?

Rétt er að minna á að rúmlega 2.500 kjósendur Sjálfstæðisflokksins í kjördæmi BB strikuðu yfir nafn hans í síðustu kosningum. Það kom þó ekki í veg fyrir að hann fengi áfram að sitja í sæti dómsmálaráðherra. Hér er kominn einlægur aðdáandi repúblikanaflokksins í BNA og G.W.Bush. Fáir kusu hann og enn færri vildu hann. Það bítur ekkert á þennan mann!

Mótmælendur eiga ekki að bíta

ÉG MÆTI NÆST!

Ég var að hlusta á hádegisfréttir á Rás 1. Þar voru fréttir af tvennum mótmælum; friðsamlegum við ráðherrabústaðinn í Tjarnargötu og ófriðsamlegum út um allar koppagrundir í Grikklandi. Ástæður fyrir þessum mótmælum virðast vera nokkuð svipaðar; stjórnvöld hafa brugðist hlutverki sínu og fjármagn úr sjóðum ríkisins rennur í vasa forréttindafólks á kostnað almennings.

Við sitjum hér uppi með kerfi sem þrjóskast við að víkja þrátt fyrir syndaregistur sem mörg bananalýðveldi myndu blikna í samanburði við. Við sitjum uppi með ríkisstjórn sem hefur algjörlega vanrækt hlutverk sitt og virðist ekki vera í neinu sambandi innbyrðis, því síður við Alþingi og hvað þá við þjóðina. Við sitjum uppi með Seðlabankastjóra sem eitt sinn var fyndinn en nú er aðhlátursefni.

Í fréttatímum sl. sólarhring hefur m.a. heyrst að Birna Einarsdóttir bankastjóri Nýja Glitnis hefur nú verið "hvítþvegin" af hinu trúverðuga Fjármálaeftirliti. Samt hefur hún orðið uppvís að því að segja ósatt og er alls ekki treystandi fyrir fjármunum almennings.

Skilanefndir gömlu bankana neita að afhenda skattrannsóknarstjóra gögn dótturfélaga þeirra í Lúxemborg enda næsta víst að þar á meðal leynast vafasamar upplýsingar um ófáa hátt setta aðila í stjórnkerfi landsins og flokkaklíkum. Hverjir skyldu eiginlega hafa skipað skilanefndirnar?

Svo fréttist af því að Fengur, eignarhaldsfélag Mr. Sterling, alias Pálmi Haraldsson, hafi ekki skilað ársreikningum síðan 2004. Mér skilst að venjulegir rekstraraðilar komist ekki upp með svona hegðun en það sama á ekki við fjárglæframenn og grænmetissvindlara eins og PH.

Flesta daga dynja á okkur fréttir af þessu tagi. Svo er hamrað á að fólkið verði að fá vinnufrið! Ég færi mótmælendum stuðningskveðjur mínar og vonast til að verða látinn vita um næstu aðgerðir svo að ég geti sjálfur sýnt minn stuðning.

Vilja ríkisstjórnina burt

Ballið er rétt að byrja

Ég var rétt áðan að fylgjast með ótrúlega fjölmennu lögregluliði fjarlægja hóp mótmælenda úr alþingishúsinu. Líklega var um 30 manna hópur lögreglumanna á staðnum - sumir óeinkennisklæddir. Það er svipað og í allri Reykjavík um helgar.

Mótmælendur höfðu hvatt alþingismenn til að eyða ekki tíma sínum til ónýtis og ríkisstjórnina til að fara frá völdum. "Drullið ykkur út! Þetta hús tilheyrir okkur!" hrópuðu mótmælendur. "Lýðræði, ekkert kjaftæði!" kölluðu svo nokkrir þeirra sem horfðu á aðfarirnar.

Það er ekki laust við að ég kvíði því að ný og sértæk lög taki gildi nú um áramótin þar sem m.a. verður heimilt að handtaka fólk án þess að nokkur skýring sé gefin. Það hlýtur að vera umhugsunarefni að á meðan að stórtækir fjárglæframenn og landráðamenn ganga lausir skuli mótmælendur vera handteknir fyrir það eitt að gera hróp að máttlausum alþingismönnum.

Mikill viðbúnaður við þinghúsið