Enn ein stríðyfirlýsing frá yfirvöldum - Mótmælum!

Geir Hroki Haarde virðist ekkert vera að læra í samskiptum við þjóðina. Þetta er ekkert annað en stríðsyfirlýsing við eigendur RÚV ohf, fólkið í landinu! Sendið Páli þessum Magnússyni tölvupóst og mótmælið tafarlaust. Hér er pótintáti ríkisvaldsins að reka erindi þess þvert á hagsmuni almennings. Skilaboðin eru skýr: Fréttamenn skulu ekki dirfast að óhlýðnast yfirboðurum sínum!

 

Reynar er spurning hvort að ekki eigi að krefjast þess að Páli sjálfum verði skilað til föðurhúsanna.

Minnið hann svo á að lækka ofurlaun sín nú þegar eins og ríkisstjórnin hefur mælst til ásamt launum helstu yfirmanna RÚV ohf. Almennum starfsmönnum hefur löngum verið naumt skammtað.

 

Sendið einnig afrit af póstinum til fréttastofu RÚV og Stöðvar 2, menntamálaráðherra, Neytendasamtakanna og Umboðsmanns Alþingis auk G. Péturs sjálfs.

[e-mail]

[e-mail]
[e-mail]
[e-mail]
[e-mail]
[e-mail]

[e-mail]

Krafa um að viðtali við Geir verði skilað

Hvað nú?

Ég var einn af þeim fjölmörgu sem ekki komust einu sinni inn í stóra salinn í Háskólabíó í gærkvöldi. Samt var ég mættur 10 mínútum fyrir 8. Fréttablaðið segir að 1.500 manns hafi lagt leið sína þangað en við vitum jú að fjölmiðlar kunna ekki að telja. Það voru a.m.k. 2.500 manns á staðnum meðan fundurinn stóð yfir og örugglega mikill fjöldi sem varð frá að hverfa.

En ríkisstjórnin er í afneitun eins og alki af verstu sort. Alltaf eru fundnar upp ástæður fyrir því að ekki sé tímabært að fara frá - ekki þegar allt hrundi - ekki þegar reynt var að semja við Breta, Hollendinga og fleiri - ekki þegar lánið mikla er skila sér - hvaða ástæða verður notuð eftir áramót? Þeim virðist fyrirmunað að skilja að nærvera þeirra spillir endurreisnarstarfinu og að tómt mál sé að tala um óháða rannsókn á þeirra eigin stjórnsýslu á meðan þau sitja enn og stjórna.

Geir hefur svosem sýnt sitt hrokafulla viðmót margoft áður og kom væntanlega engum á óvart en Solla kom viðmælendum sínum örugglega í opna skjöldu þegar hún sagði viðmælendur sína ekki dæmigerða fyrir vilja þjóðarinnar. Hún kýs semsagt frekar að líta á einhverja aðra sem hina sönnu þjóð - skyldi það vera fólkið sem Hannes Hólmsteinn lýsti með orðunum "...hafa engan áhuga á pólitík" og "...vilja græða á daginn og grilla á kvöldin"?

Ræðumenn stóðu sig með ágætum og vel þess virði að hlusta á ræður þeirra aftur. Þar var m.a. varað við því að yfirvöld taki ekki mark á friðsamlegum mótmælunum því að það væri ekki sjálfgefið að þau héldu áfram að vera friðsamleg. Ég býst ekki við að margir vilji sjá hér bardaga á götum úti, brennandi bíla og sérsveit BB með piparúðabrúsa út um allar koppagrundir.

„Þetta er þjóðin“

Slökkvistarfið gengur illa

Maður hlýtur bara að spyrja sjálfan sig: Ætla þessir sjálfskipuðu slökkviliðsmenn sem sjálfir kveiktu eldana ekki að stíga niður af stallinum fyrr en allt er brunnið sem brunnið getur?

 

Mætum öll í Háskólabíói í kvöld og sjáum hvaða þingmenn og ráðherrar hafa manndóm til að mæta okkur augliti til auglitis!

 

Veikir málstað Íslendinga

22.11.2008

Mér er nóg boðið. Ég er raunar bálreiður.
Það er ekki svo lítið sem við öll þurfum að kyngja þessa dagana.
Á hverjum degi berast okkur fréttir - nær undantekningalaust slæmar fréttir.

Og svo erum við höfð fyrir rangri sök.

Ég tók þá afstöðu að reyna að sætta mig við ástandið eftir fremsta megni.
Þess vegna lít ég ekki á hækkandi vöruverð sem stórt áfall.
Þess vegna vonast ég til að atvinnuleysi verði ekki langvarandi hjá mörgum.
Þess vegna syrgi ég það ekki mjög mikið þó eitthvað af sparifé mínu hafi tapast.
Þess vegna trúi ég því að húsnæðislánin muni ekki hækka meira en ég ræð við.

Á hverjum degi berast okkur fréttir af ótrúlegum fjármálagjörningum.
Allir þekkja söguna um Icesave og Kaupthing Edge.
Hins vegar er undanþáguákvæði í tilskipun ESB sem hefði getað minnkað ábyrgð Íslendinga.
Þetta mál var sett í nefnd fyrir ári síðan og gleymdist þar!
Geir sagði í Kastljósinu í fyrradag: "Það var einhver undanþága sem menn nýttu sér ekki."
Hver ber ábyrgð á þessu? Eru ráðamenn ekki með réttu ráði?

Auk þess hafa íslensku bankarnir útdeilt ómældu fé til sérvalinna fyrirtækja og einstaklinga.
Skúffufyrirtækið Stím ehf fékk t.d. 25.000 milljónir lánaðar frá Glitni til hlutabréfakaupa.
Hlutabréfin sem Stím keypti voru í Glitni sjálfum og FL-group (sömu eigendur).
Eina tryggingin fyrir þessu láni var veð í hlutabréfunum sem keypt voru = engin áhætta.
Flestir sjá að þetta er peningavél - þetta er stórkostlega glæpsamlegt athæfi að yfirlögðu ráði.
En þegar upp er staðið þurfum við hin að borga reikninginn.

Davíð Oddsson er svo sannarlega ekki maður að mínu skapi.
Eins og allir vita hefur hann látið ýmislegt ógætilegt flakka með hörmulegum afleiðingum.
En hann vill ekki vera sökudólgur fremur en aðrir ráðamenn.
Samt sagði hann ýmislegt athyglisvert í ræðu sinni sl. þriðjudag. Hann sagði þar m.a.:
"En það er ekki verið að rannsaka neitt og það sem verra er, það er ekki verið að upplýsa almenning um eitt eða neitt."
Það er m.ö.o. verið að láta glæpamennina sleppa - tíminn vinnur með þeim.

Í fréttum á RÚV í kvöld var þessi frétt.
Eins og sjá má var rekstur bankanna okkar ein stór svikamylla.
Reynt var að raka inn lánsfé sem jafnharðan var lánað út án öruggra trygginga.
Þeir sem í þessu stóðu voru með margar milljónir í laun á mánuði auk bónusa.
Tæpast var gert ráð fyrir því að skuldir þyrfti að greiða tilbaka nema með öðrum lánum.

Fólkið sem í þessu stóð hefur flest verið skipað í aðrar stöður í nýju bönkunum.
Í flestum löndum væri þetta fólk undir rannsókn og með réttarstöðu grunaðra.
Okkur er hins vegar sagt að það megi ekki persónugera vandann!

Kæru vinir, fyrir alla muni mætið á Austurvöll og mótmælið!
Fundurinn byrjar kl. 15 í dag, laugardag og varir einungis 30-40 mínútur.
Það munar um sérhvern mann - alltaf er reynt að gera minna úr þessu í ríkisstjórnarmiðlum.
Takið börnin með en skiljið eggin eftir heima.
Það er ófyrirgefanlegt að sitja heima og gera ekki neitt.

Sjáumst,

Siggi Hr.

Forstjóri verndaður?

Lítil eftirsjá í Jóni

Sjálfstæðismenn keppast nú hver um annan þveran að lýsa því yfir að þeir hræðist ekki kosningar og að lýðræðisástin sé þeim í blóð borin. Ekki sýna þeir þó mikla tiltrú á lýðræðinu fyrst þeir taka það ekki í mál að ganga til kosninga eftir eitt mesta klúður Íslandssögunnar. Skýringin er vitaskuld sú að þeir þurfa að horfast í augu við algjört fylgishrun og hugsanlegan klofning í ofanálag. Jón Gunnarsson gæti t.d. þurft að gera það upp við sig hvorn arminn af flokkshræinu hann muni hengja sig á, þeim ESB sinnaða eða einangrunarsinnaða.

Jón þessi er einna kunnastur fyrir árásir sínar á umhverfisráðherra og kemur það varla mörgum á óvart að honum finnist hún eiga að víkja. Það væri hins vegar að byrja á öfugum enda ef Þórunn segði af sér af öllum syndaselum ríkisstjórnarinnar, Seðlabanka og Fjármálaeftirlits.

Gagnrýnir Björgvin og Þórunni

Auðvitað ekkert upp á Seðlabankann að klaga

Geir er enn við sama heygarðshornið. Ég biðla til helstu sálfræðinga okkar að útskýra þetta heilkenni fyrir þjóðinni. Sjálf þjóðin er haldin Stokkhólmheilkenni segir  hér. Nauðsynleg viðbót er komin við okkar slöku fréttamiðla. Til hamingju með Smuguna.

Ef grein Hallgríms Helgasonar í Fréttablaðinu í dag tekst ekki að vekja Samfylkinguna til meðvitundar þá er næsta víst að fylgishrun bíður þeirra líkt og Sjálfstæðisflokksins þegar kosið verður í vor. Það eru ófáir kjósendur Samfylkingarinnar sem mæta á hverjum laugardegi í kulda og trekki til að krefjast þess að ráðamenn axli ábyrgð. Væntanlega verður 10.000 manna múrinn klofinn um næstu helgi. (Það myndi t.d. samsvara 1,33 milljón manns í Madrid).

Samfylkingin hefur mjálmað um Davíð Oddsson og Seðlabankann á ríkisstjórnarfundum og Alþingi án þess að nokkuð hafi gerst - hann nýtur enn fyllsta trausts forsætisráðherra og stjórnin tekur undir í þeim falska söng. Sjálfur beið ég spenntur í fyrradag eftir því að Samfylkingin tilkynnti um stjórnarslit eftir krísufund sem stóð hátt á þriðju klst. Niðurstaða fundarins var ekki vonbrigði - hún var grafskrift.

Nýja Seðlabankastjórn

Átyllan fundin!

Hér er væntanlega komin átyllan sem beðið var eftir svo hægt væri að losa sig við Davíð án þess að honum væri beinlínis vikið frá. Einhverjir spunameistarar með hagfræðiþekkingu sitja væntanlega sveittir og skrifa greinargerð um mikilvægi þess að sameina þessar stofnanir sem allra fyrst. Almenningur veit hina raunverulegu ástæðu en flestir munu yppta öxlum af gömlum vana enda búnir að kyngja ýmsu bragðvondu glundri á sl. árum.

Að mínu mati getur sitjandi ríkisstjórn ekki mögulega borið ábyrgð á fleiri mistökum en orðin eru. Það stenst engin rök að hún geti tekið stórar ákvarðanir um lausn vandans og framtíð þjóðarinnar. Það er verulega sorglegt að ekki einn einasti ráðherra hafi lýst sig ábyrgan eða beðist afsökunar, hvað þá stjórnendur Seðlabanka og Fjármálaeftirlits. Það verður aldrei nokkur sátt um neina rannsókn á því sem gerst hefur nema því aðeins að sitjandi ráðamenn komi þar hvergi nærri og geti engin áhrif haft á úrvinnslu og aðferðafræði.

Bæði Sjálfstæðisflokkur og Samfylking munu gjalda það dýru verði að hafa ekki tekið af skarið strax eftir að Kaupþing féll og gætt þess að ná sem víðtækastri samstöðu um neyðaraðgerðir. Með því gerði ríkisstjórnin illt verra og traustið dvínaði bæði hérlendis og erlendis.

Þjóðin á ekki að þurfa að bíða í algjörri óvissu og vona það besta á meðan að ríkisstjórnarflokkarnir taka sig saman í andlitinu, ræða málin í bakherbergjum eða á landsfundum þar sem innbyrðis deilur munu hæglega geta klofið flokkana sundur!

 

Hugmynd forsætisráðherra

Hrollur unaðssemda og ónota

Það hríslast einhver hrollur unaðssemda og ónota um mann þegar fréttist af afsögnum enn eins Framsóknarmannsins. Þetta er orðinn reglubundinn viðburður líkt og í sumum framandi menningarsamfélögum þar sem  húsdýrum er fórnað af einhverri misskilinni lotningu fyrir æðri máttarvöldum.

Listinn yfir fallna Framsóknarmenn síðustu 3-4 ár er orðinn lengri en góðu hófi gegnir og á líklega eftir að lengjast enn frekar. Efstu menn á listum hverfa á braut og minni spámenn færast á undraverðum hraða ofar, ef þeir hafa þá ekki þegar sagt af sér líka.

Skyndilega eru konurnar á varamannabekkjunum komnar með hlutverk við hæfi. Það má líklega segja um Framsóknarflokkinn að þar séu hin fleygu orð í fullu gildi: Þeir síðustu verða fyrstir.

 

Topp 10 listi fallinna Framsóknarmanna er hér. Farið hefur fé betra. Þau rauðu eiga meira að segja rétt á sérstökum ráðherraeftirlaunum sem þau skömmtuðu sér sjálf! Jónína var einn af flutningsmönnum frumvarpsins.

 

 

Finnur Ingólfsson.
Jónína Bjartmarz.
Halldór Ásgrímsson.
Björn Ingi Hrafnsson.
Guðni Ágústsson.
Árni Magnússon.
Jón Sigurðsson.
Bjarni Harðarson.
Anna Kristinsdóttir.
Marsibil Sæmundardóttir.

Kiddi Sleggja (bónussæti).

„Bjarni móðgar framsóknarmenn"

Þegar öllu er á botninn hvolft...

Þegar öllu er á botninn hvolft er það líklegast happ að ríkisstjórnin og aðrir sökudólgar skuli enn þráast við að taka pokann sinn. Sú orka sem er að leysast úr læðingi meðal fólksins er undursamleg og mun eflaust verða þjóðinni til mikillar gæfu þegar fram líða stundir. Að heyra allt þetta frábæra fólk tjá sig af brennandi ólgu, hreinskilni og óttalaust er eitthvað það ánægjulegasta sem ég hef orðið vitni að lengi.

Þau Gunnar Sigurðsson, Davíð A. Stefánsson og félagar hans eiga mikið hrós skilið fyrir að standa fyrir þessum fundum. Næsti fundur verður haldinn í Háskólabíói og er þá eins gott að ríkisstjórnin, þingmenn og DO láti sig ekki vanta. Það mun verða RÚV til ævarandi skammar ef þeir senda ekki út beint frá þeim fundi í Sjónvarpinu.

„Stórkostlegur fundur“

Bréf til RÚV

Ég sendi fyrir stuttu síðan eftirfarandi tölvupóst á Óðinn Jónsson <[e-mail]>, Pál Magnússon <[e-mail]>, Sigrúnu Stefánsdóttur <[e-mail]> og Þórhall Gunnarsson <[e-mail]>:

Góðan dag,

Mig langar að forvitnast hvað þarf fjölmenna mótmælafundi til að RÚV-Sjónvarp sendi beint út frá þeim? Ég minni á að þegar vörubílstjórar mótmæltu við Geitháls var aukafréttatími sendur út beint þaðan.

Á morgun kl. 15 er reiknað með mörg þúsund óánægðum Íslendingum á Austurvöll. Hugsanlega verða þetta fjölmennustu mótmæli Íslandssögunnar. Ætlar Sjónvarp allra landsmanna að verja sjálfstæði sitt eða fylgja þöggunarstefnu stjórnvalda?

Svar óskast.

Með góðri kveðju,

Sigurður H. Sigurðsson.

Ég ákvað að deila þessu áhugamáli með ykkur hér á blogginu. Samt vil ég taka það skýrt fram að ég er stuðningsmaður RÚV  en vil hvorki að auglýsendur né stjórnmálaflokkar ráði dagskrárstefnu og fréttamati. Mér finnst einfaldlega að fjölmiðli sem öllum er gert að borga fyrir beri að senda svona viðburð út beint til allra þeirra sem ekki eiga þess kost að mæta sjálfir.

Icesave skuldin 640 milljarðar