Heimurinn fylgist með

Nú ríður á að allir þeir sem ekki eru sáttir við núverandi ástand mæti og sýni umheiminum hug sinn. Það verða eflaust margir myndatökumenn frá erlendum sjónvarpsstöðvum og mikilvægt að fólk sýni hvernig þeim er innanbrjósts.

Franskur kunningi minn fylgdist með mótmælunum um síðustu helgi. Hann sagði að Íslendingar væru augljóslega ekki mjög sjóaðir í þessu enda lítil hefð fyrir slíku hér. Mistök hefðu verið að hefja fundinn á tónleikum eins og um útiskemmtun væri að ræða og fólk gæti ekki bara staðið kyrrt eins og ánægðir áhorfendur með bros á vör.

Hann sagði að fólk þyrfti að sýna að því væri virkilega heitt í hamsi og væri raunverulega að reyna að koma boðskap til stjórnvalda og umheimsins. Mótmælaspjöld ættu að vera á tungumáli eða myndmáli sem flestir skilja.

Þessum athugasemdum er allavega hér með komið á framfæri. Það er hins vegar aðalatriðið að mæta, hvort heldur fólk heldur á spjöldum eða ekki.
 
Burt með árans spillingarliðið! 

Mótmæli á Austurvelli í dag

Björk vs. Björn

Eins og ég hef áður sagt er Björk frábær fulltrúi þjóðarinnar, meira nú en nokkru sinni fyrr. Ég tek heilshugar undir skoðun hennar að Íslendingum beri að ganga til aðildarviðræðna við ESB og taka þátt í sameinaðri Evrópu. Þetta er ekki bara spurning um eiginhagsmuni þjóðarinnar heldur það að friðvænleg Evrópa standi saman á sem flestum sviðum, þ.m.t. umhverfismálum. Íslendingar væru ekki á þessu flæðiskeri staddir ef misvitrir stjórnmálamenn (Davíð og fleiri) hefðu ekki markvisst vílað og dílað með fjöregg þjóðarinnar.  

 

 

Það var aumkunarvert að hlusta á Björn Bjarnason á RÚV rétt í þessu sem vill nú sleikja Bandaríkin upp og leita ásjár hjá þeim. Við Björn og félaga hans í ríkisstjórninni segi ég:

 BURT MEÐ YKKUR OG ALLT SPILLINGARLIÐIÐ ÁÐUR EN ÞIÐ GERIÐ ILLT VERRA!!!

www.kjosa.is

Björk vill að Ísland gangi í ESB

Nú er Smuga

Það er gleðilegt á tímum einokunar á fjölmiðlamarkaði að nýr miðill líti dagsins ljós. Oft hefur verið þörf en nú er nauðsyn. Vonandi tekst aðstandendum Smugunnar að skapa mótvægi við hina fjölmiðlana og fréttaflutning sem bragð er að. Tengingin við VG er ef til vill ekki mjög æskileg en gott að það sé upplýst.

 www.kjosa.is

Burt með allt spillingarliðið!

Smuga á leiðinni

Askja Pandóru

Það er gleðilegt að svo margir gefi sér tíma til að senda Gordon Brown félögum þessi skilaboð. Ef til vill væri ekki úr vegi að senda líka Geir Haarde og íslensku ríkisstjórninni skýr skilaboð um að þeim sé ekki treystandi til að koma okkur úr þeirri ömurlegu stöðu sem þeir sjálfir bera mesta ábyrgð á. Á hverjum degi sem líður opnar askja Pandóru sig meir og meir og rotið innihaldið gýs upp.

Ég kæri mig ekki um að innvígðir flokksbræður verði látnir rannsaka glæpsamleg undanskot siðlausra fjárglæframanna, mistök í lagasetningu, klúður Seðlabankans og eftirlitsstofnana. Ég treysti ekki lengur ríkisstjórninni til að taka skynsamlegar ákvarðanir fyrir þjóðina. Það er okkar eina von að fá nýtt fólk (sérstaklega konur) til að taka á þessu vandamáli með aðstoð óháðra erlendra sérfræðinga. Reynum að læra af eigin reynslu og annarra þjóða!

 www.kjosa.is

Burt með spillingarliðið, hvar í flokki sem það stendur!

75 þúsund hafa skrifað undir

Þjóðin játar sig sigraða

Nýjar stjórnir bankana vera pólitískt skipaðar viðurkennir Björgvin. Húrra, húrra! Og hvaða flokksgæðinga skyldu þeir draga upp úr pússi sínu í þetta sinn?

Af hverju er ekki komin þjóðstjórn??? Shit, þá væri Framsóknarflokkurinn kominn að kjötkötlunum enn eina ferðina. Þjóðin játar sig sigraða!

 

Bankamenn fá ekki sérmeðferð

Ástæða til tortryggni

Það liggur við að maður vorkenni henni Þorgerði að tapa sparnaði þeirra hjóna. Hún er eflaust vonsvikin og segist ekki vilja líða fyrir tortryggnina í samfélaginu. 

Hins vegar er stóra málið að allt of mikil bein tengsl hafa verið á milli stjórnmálaflokkanna og bankanna. Einkavæðing þeirra var svívirða og gerð með sérhagsmuni að leiðarljósi en ekki þjóðarhagsmuni. Þjóðin situr hins vegar uppi með þrotabúið og vill væntanlega ekki líða fyrir það meira en orðið er. Þess vegna er ekki hægt að samþykkja að sama fólkið eða tengdir aðilar hafi hönd í bagga með rannsókn og enduruppbyggingu. Að öðrum kosti verður aldrei nein sátt í þjóðfélaginu og afleiðingarnar langvarandi eftir því.

Þorgerður hefur sýnt töluverða leiðtogahæfileika og á eflaust afturkvæmt í stjórnmálin ef hún kærir sig um. Hins vegar verður ríkisstjórnin að sleppa takinu og koma verður á þjóðstjórn þangað til unnt er að kjósa á ný. Það gerir bara illt verra að þrjóskast við.

Svo má ég til með að vara við nýjum lögum um meðferð sakamála sem taka gildi 1. jan. 2009. Þar segir m.a. í 90. grein:

"Nú verður uppþot eða fjölmennar óeirðir brjótast út sem hafa haft eða gætu haft í för með sér líkamsmeiðingar eða stórfelld eignaspjöll og ekki verður með vissu bent á hinn seka eða hina seku og er þá lögreglu heimilt að handtaka hvern þann sem nærstaddur er og ástæða er til að gruna um refsiverða háttsemi."

Við skulum ekki gleyma hvaða dómarar eiga að dæma mótmælendur ef allt fer úr böndunum.

Óþolandi að líða fyrir tortryggni

Misskilningur eða misnotkun

Misskilningurinn er ekki einungis bundinn við "lýðinn" eins og skilja má á orðum BB. Það vill svo til að 18% kjósenda flokksins í Reykavíkurkjördæmi suður strikuðu út nafn hans á listanum og við það færðist hann niður úr öðru sæti í það þriðja reglum samkvæmt. Engu síður misskildi Björn skilaboðin sem í þessu fólust og þáði áfram sæti dómsmálaráðherra í boði Geirs Haarde. Líklega mátti ekki persónugera vandann.

Á ferli sínum hafa Björn og nánustu samstarfsmenn hans iðulega misskilið mikilvægi þess að ráða óháða menn í valdamiklar stöður innan lögreglu og dómskerfis. T.d. réði hann árið 2003 frænda Davíðs Oddssonar sem hæstaréttardómara þó að 3 aðrir væru metnir hæfari. Árið eftir réði hann (með aðstoð Geirs Haarde) einn besta vin Davíðs í samskonar embætti en 2 aðrir voru hæfari. Loks réði hann son Davíðs (með aðstoð Árna dýralæknis) í embætti héraðsdómara þar sem 3 voru metnir hæfari. Sjá hér umfjöllun um málin. Björn og fjölmargir aðrir þingmenn flokksins vörðu þessar ráðningar, jafnvel þegar virtir fræðimenn eins og Sigurður Líndal skrifuðu rökstudda gagnrýni. Með þessum gjörningum hafa ráðherrar Sjálfstæðisflokksins dregið mjög úr trúverðugleika dómskerfisins og verður það ærið verkefni að vinda ofan af því. 

Ráðherra dómsmála! Ekki meir, ekki meir!

Björn Bjarnason: Ákveðinn misskilningur í gangi

Sóknarfæri

Þó svo að vonbrigði margra á Húsavík séu skiljanleg ættu þeir ekki að beina gremju sinni gegn umhverfiráðherra eða fólki úr náttúruverndarsamtökum. Það er augljóst að fjármálakreppan víða um heim og hrun á álverði er helsta ástæða þess að Alcoa heldur nú að sér höndum. Einnig sýnir þetta að nóg er komið af álverum á Íslandi því að ekki má gera efnahag landsins of háðan sveiflukenndu markaðsvirði áls, svo ekki sé talað um ímynd landsins!

 

Nú ættu menn að hugsa sinn gang og skoða í alvöru uppbyggingu heilsutengdrar ferðaþjónustu á svæðinu. Í ljósi breyttra aðstæðna er skiljanlega ekki hægt að reikna með mjög fjárfrekum framkvæmdum enda verður lánsfé af skornum skammti á næstunni. Það er einna helst orðstír náttúru Íslands sem minnsta hnekki hefur borið að undanförnu og hljóta menn að líta á það sem sóknarfæri þegar annað bregst.

 

Dregur úr líkum á álveri

Siðferði fjarri góðu gamni

Ef það er rétt skilið að stór fjárfestingarfélög og/eða íslensku bankarnir hafi veðjað á veikingu íslensku krónunnar og tekið þátt í árásum á hana til að hirða skjótfenginn gróða, þá hlýtur hér að vera um yfirgengilega og glæpsamlega hegðun gegn íslensku þjóðinni að ræða. Þetta verður að fá á hreint og draga menn til saka sem tóku ákvarðanir sem settu fjölda fólks og fyrirtækja á kaldan klaka. Því miður virðist viðskiptasiðferði sumra hafa verið víðs fjarri.

 

Veðjuðu á veikingu krónunnar

Steingrímur verður að víkja!

Steingrímur J. er samur við sig. Hann vill taka upp myntsamstarf við Noreg þó svo að Stoltenberg forsætisráðherra hafi slegið þá hugmynd út af borðinu. Líkt og Hjörleifur Guttormsson og Ragnar Arnalds er hann andsetinn af ranghugmyndum um ESB og vill ekki hlusta á tvo þriðju hluta stuðningsmanna VG sem kalla eftir aðildarviðræðum og Evruvæðingu í framhaldi af því. Trúlega mun hann ásamt Guðna Ágústssyni og fleiri stjórnmálaleiðtogum þurfa að víkja fyrst hann skynjar ekki vilja kjósenda.

 

Til hvers skyldum við að púkka upp á stjórnmálamenn sem vilja stöðugt hafa vit fyrir okkur? Kýs maður ekki fólk og flokka sem maður á hugmyndafræðilega samleið með? 

 

Ef VG mannaði sig upp í að breyta um stefnu í Evrópumálum myndi ég hugsanlega kjósa þá í vor. Að öðrum kosti tel ég þá vera talsmenn áframhaldandi einangrunarhyggju og efnahagslegs volæðis. Vonandi verða samt aðrir og betri möguleikar í boði.

 

Ég vil sjá Guðfríði Lilju í framvarðasveit VG og Láru Hönnu inn á þing!

Vill að kosið verði í vor