Byrjað öfugu megin

Jeppalingur útvarpsstjóra er að vísu svartur og myndin samsett, en var ekki byrjað á vitlausum enda í niðurskurðinum eins og venjulega? Mánaðarlegar afborganir RÚV ohf af þessu farartæki eru líklega á við laun eins fréttamanns.

Í boði Bláu krumlunnar

Enn er Sjálfstæðisflokkurinn að þrengja að RÚV - núna á að segja upp 44 starfsmönnum (verktakar eru að sjálfsögðu taldir með) en örugglega engum stjórnendum. Frumvarp menntamálaráðherra sem hefur óhjákvæmilegan niðurskurð í för með sér hefur enn ekki verið sent þingflokkunum en samt er búið að tilkynna um niðurskurðinn meðal starfsmanna RÚV - til hvers halda alþingismenn eiginlega að þeir séu?

Alþingi hefur afhent framkvæmdavaldinu alræðisvald og er í raun orðinn kjaftaklúbbur af síðustu sort. Af hverju er þingmennska ekki bara gerð að hlutastarfi - einn dag í viku til að samþykkja frumvörpin sem ráðherrarnir afhenda? Það myndi eflaust sparast milljarður þar eða tveir. Best væri að loka búllunni og opna þar götueldhús.

Útvarpsstjóri þiggur þreföld þingmannalaun fyrir það hlutskipti sitt að vera málaliði "Bláu krumlunnar". Heyrst hefur að hann muni lækka um 10% í launum ásamt öðrum æðstu yfirmönnum RÚV en af hverju er aldrei hagrætt með því að fækka yfirmönnum? Öðrum starfsmönnum er fækkað og munu margir þurfa að taka á sig umtalsverðar launalækkanir.

Ætlar Sjálfstæðisflokkurinn ekki að hætta fyrr en öllu hefur verið komið í þrot?

700 milljóna sparnaður hjá RÚV

Í boði Flokksins

Ég ætla nú rétt að vona að Katrín mæti aftur næsta laugardag og fylgi ræðunni eftir.

Annars finnst mér þessar kvartanir nema við HR vera þeim til skammar. Hvað nú ef einhver þeirra sjálfra hefði haldið innblásna ræðu á fjölmennum fundi fyrir ári síðan þar sem nýfrjálshyggja hefði verið umræðuefnið? Eru þetta eintómir plebbar sem ekki þurfa að leggja mikið á sig í náminu til að fá öruggt starf á vegum Flokksins?

Óánægð með ræðu á heimasíðu

Boðorðin 10

Ég þykist fullviss um að mikil eftirspurn sé eftir nýju stjórnmálaafli. Þó svo að ég vilji gjarnan sníða málefnaskrá slíkrar hreyfingar að öllum mínum persónulegu skoðunum þá býst ég ekki við að það sé vænlegt til árangurs. Hins vegar gat ég ekki stillt mig um að setja niður nokkur grunnmarkmið eða boðorð sem hljóta að falla vel að hinu "Nýja Íslandi".

1. Pólitískar stöðuveitingar eiga ekki að líðast - Það er ólíðandi að stjórnmálaflokkar komi útsendurum sínum fyrir í lykilstöðum, embættum, stjórnum, nefndum og í fjölmiðlum. Af þeim sökum er færasta fólkið oft og iðulega sniðgengið af því að það er ekki með (rétt) flokksskýrteini í vasanum eða vill stunda sín störf án tengsla við stjórnmálaflokkana.

2. Fjármál stjórnmálaflokka skulu vera opin til að fyrirbyggja óeðlileg hagsmunatengsl - Ef bókhaldið þolir ekki dagsins ljós hlýtur að vera góð og gild ástæða fyrir því. Það þarf að vera hafið yfir allan vafa að stjórnmálaflokkar og einstakir stjórnmálamenn gangi ekki erinda stuðningsaðila og fjársterkra bakhjarla.

3. Gæta skal jafnvægis á milli kynja á listum og þegar skipað er í embætti og nefndir - Ætti að vera sjálfgefið á 21. öldinni en treglega hefur gengið að ná fullu jafnræði, ekki síst með tilliti til launa. Einnig hefur berlega komið í ljós að áhættusækni karla þarf nauðsynlegt mótvægi sem áhættufælni kvenna veitir.

4. Efla skal þingræði og sjálfstæða ákvarðanatöku þingmanna - Þeim ber að kynna sér málin eftir bestu getu og láta eigin sannfæringu ráða. Flokksagi má ekki taka völdin og gera einstaka þingmenn að viljalausum verkfærum. Stjórnarmeirihluti verður að láta af þeim leiða ósið að valta sífellt yfir minnihlutann. Minnihlutastjórn á að geta verið raunhæfur möguleiki.

5. Aðskilja skal framkvæmdavald, löggjafarvald og dómsvald - Ráðherrar eiga að starfa utan þings og skilyrðislaust að vera valdir með menntun, reynslu og hæfni að leiðarljósi. Dómara skal tilnefna samkvæmt hæfnismati dómsnefndar en ekki hentisemi einstakra ráðherra eða pólitískra afla. (Byggja á hugmyndum Vilmundar Gylfasonar).

6. Hagsmunir þjóðarinnar skulu ætíð ganga fyrir hagsmunum stjórnmálaflokkanna - Það má aldrei slá mikilvægum ákvörðunum á frest vegna þess að þær séu umdeildar innan stjórnmálaflokks. Umræða þarf að geta átt sér stað á Alþingi þó svo að landsfundir einstakra flokka hafi ekki tekið afstöðu til málsins.

7. Stjórnmálamönnum og stjórnendum ríkisstofnana ber að axla ábyrgð á mistökum sínum - Það er fáheyrt að íslenskir embættis- eða stjórnmálamenn segi sig frá störfum ef þeir eru uppvísir af misnotkun, spillingu eða alvarlegum mistökum. Nauðsynlegt er að auka siðgæðisvitund meðal þeirra.

8. Eftirlitsstofnanir skulu starfa óháð stjórnmálaflokkum - Það verður að vera hafið yfir allan vafa að eftirlitsstofnanir geti gegnt skyldum sínum án afskipta stjórnmálamanna. Sama gildir um embætti Ríkissaksóknara, dómstóla, Fjármálaeftirlits, Seðlabanka og rannsóknarnefnda.

9.  Lýðræðishalla verður að rétta af eftir fremsta megni - Efna skal til þjóðaratkvæðagreiðslu um hin stóru mál. Einnig þarf að endurskoða fyrirkomulag kosninga þannig að allir kjósendur njóti jafnræðis (landið eitt kjördæmi) og fái að forgangsraða frambjóðendum af listum, jafnvel í mismunandi stjórnmálaflokkum. Væri ekki réttast að kjósa forsætisráðherra líka?

10. Borgarafundir skulu haldnir reglulega - Það hefur sýnt sig að beint samband á milli þingkjörinna fulltrúa og almennings eykur gagnkvæman skilning. Þó svo að hlutverk fjölmiðla sé mikilvægt og fjölbreytni í fjölmiðlun, þarf rödd fólksins að heyrast miklu oftar en í aðdraganda kosninga.

Enn ein stríðyfirlýsing frá yfirvöldum - Mótmælum!

Geir Hroki Haarde virðist ekkert vera að læra í samskiptum við þjóðina. Þetta er ekkert annað en stríðsyfirlýsing við eigendur RÚV ohf, fólkið í landinu! Sendið Páli þessum Magnússyni tölvupóst og mótmælið tafarlaust. Hér er pótintáti ríkisvaldsins að reka erindi þess þvert á hagsmuni almennings. Skilaboðin eru skýr: Fréttamenn skulu ekki dirfast að óhlýðnast yfirboðurum sínum!

 

Reynar er spurning hvort að ekki eigi að krefjast þess að Páli sjálfum verði skilað til föðurhúsanna.

Minnið hann svo á að lækka ofurlaun sín nú þegar eins og ríkisstjórnin hefur mælst til ásamt launum helstu yfirmanna RÚV ohf. Almennum starfsmönnum hefur löngum verið naumt skammtað.

 

Sendið einnig afrit af póstinum til fréttastofu RÚV og Stöðvar 2, menntamálaráðherra, Neytendasamtakanna og Umboðsmanns Alþingis auk G. Péturs sjálfs.

[e-mail]

[e-mail]
[e-mail]
[e-mail]
[e-mail]
[e-mail]

[e-mail]

Krafa um að viðtali við Geir verði skilað

Hvað nú?

Ég var einn af þeim fjölmörgu sem ekki komust einu sinni inn í stóra salinn í Háskólabíó í gærkvöldi. Samt var ég mættur 10 mínútum fyrir 8. Fréttablaðið segir að 1.500 manns hafi lagt leið sína þangað en við vitum jú að fjölmiðlar kunna ekki að telja. Það voru a.m.k. 2.500 manns á staðnum meðan fundurinn stóð yfir og örugglega mikill fjöldi sem varð frá að hverfa.

En ríkisstjórnin er í afneitun eins og alki af verstu sort. Alltaf eru fundnar upp ástæður fyrir því að ekki sé tímabært að fara frá - ekki þegar allt hrundi - ekki þegar reynt var að semja við Breta, Hollendinga og fleiri - ekki þegar lánið mikla er skila sér - hvaða ástæða verður notuð eftir áramót? Þeim virðist fyrirmunað að skilja að nærvera þeirra spillir endurreisnarstarfinu og að tómt mál sé að tala um óháða rannsókn á þeirra eigin stjórnsýslu á meðan þau sitja enn og stjórna.

Geir hefur svosem sýnt sitt hrokafulla viðmót margoft áður og kom væntanlega engum á óvart en Solla kom viðmælendum sínum örugglega í opna skjöldu þegar hún sagði viðmælendur sína ekki dæmigerða fyrir vilja þjóðarinnar. Hún kýs semsagt frekar að líta á einhverja aðra sem hina sönnu þjóð - skyldi það vera fólkið sem Hannes Hólmsteinn lýsti með orðunum "...hafa engan áhuga á pólitík" og "...vilja græða á daginn og grilla á kvöldin"?

Ræðumenn stóðu sig með ágætum og vel þess virði að hlusta á ræður þeirra aftur. Þar var m.a. varað við því að yfirvöld taki ekki mark á friðsamlegum mótmælunum því að það væri ekki sjálfgefið að þau héldu áfram að vera friðsamleg. Ég býst ekki við að margir vilji sjá hér bardaga á götum úti, brennandi bíla og sérsveit BB með piparúðabrúsa út um allar koppagrundir.

„Þetta er þjóðin“

Slökkvistarfið gengur illa

Maður hlýtur bara að spyrja sjálfan sig: Ætla þessir sjálfskipuðu slökkviliðsmenn sem sjálfir kveiktu eldana ekki að stíga niður af stallinum fyrr en allt er brunnið sem brunnið getur?

 

Mætum öll í Háskólabíói í kvöld og sjáum hvaða þingmenn og ráðherrar hafa manndóm til að mæta okkur augliti til auglitis!

 

Veikir málstað Íslendinga

22.11.2008

Mér er nóg boðið. Ég er raunar bálreiður.
Það er ekki svo lítið sem við öll þurfum að kyngja þessa dagana.
Á hverjum degi berast okkur fréttir - nær undantekningalaust slæmar fréttir.

Og svo erum við höfð fyrir rangri sök.

Ég tók þá afstöðu að reyna að sætta mig við ástandið eftir fremsta megni.
Þess vegna lít ég ekki á hækkandi vöruverð sem stórt áfall.
Þess vegna vonast ég til að atvinnuleysi verði ekki langvarandi hjá mörgum.
Þess vegna syrgi ég það ekki mjög mikið þó eitthvað af sparifé mínu hafi tapast.
Þess vegna trúi ég því að húsnæðislánin muni ekki hækka meira en ég ræð við.

Á hverjum degi berast okkur fréttir af ótrúlegum fjármálagjörningum.
Allir þekkja söguna um Icesave og Kaupthing Edge.
Hins vegar er undanþáguákvæði í tilskipun ESB sem hefði getað minnkað ábyrgð Íslendinga.
Þetta mál var sett í nefnd fyrir ári síðan og gleymdist þar!
Geir sagði í Kastljósinu í fyrradag: "Það var einhver undanþága sem menn nýttu sér ekki."
Hver ber ábyrgð á þessu? Eru ráðamenn ekki með réttu ráði?

Auk þess hafa íslensku bankarnir útdeilt ómældu fé til sérvalinna fyrirtækja og einstaklinga.
Skúffufyrirtækið Stím ehf fékk t.d. 25.000 milljónir lánaðar frá Glitni til hlutabréfakaupa.
Hlutabréfin sem Stím keypti voru í Glitni sjálfum og FL-group (sömu eigendur).
Eina tryggingin fyrir þessu láni var veð í hlutabréfunum sem keypt voru = engin áhætta.
Flestir sjá að þetta er peningavél - þetta er stórkostlega glæpsamlegt athæfi að yfirlögðu ráði.
En þegar upp er staðið þurfum við hin að borga reikninginn.

Davíð Oddsson er svo sannarlega ekki maður að mínu skapi.
Eins og allir vita hefur hann látið ýmislegt ógætilegt flakka með hörmulegum afleiðingum.
En hann vill ekki vera sökudólgur fremur en aðrir ráðamenn.
Samt sagði hann ýmislegt athyglisvert í ræðu sinni sl. þriðjudag. Hann sagði þar m.a.:
"En það er ekki verið að rannsaka neitt og það sem verra er, það er ekki verið að upplýsa almenning um eitt eða neitt."
Það er m.ö.o. verið að láta glæpamennina sleppa - tíminn vinnur með þeim.

Í fréttum á RÚV í kvöld var þessi frétt.
Eins og sjá má var rekstur bankanna okkar ein stór svikamylla.
Reynt var að raka inn lánsfé sem jafnharðan var lánað út án öruggra trygginga.
Þeir sem í þessu stóðu voru með margar milljónir í laun á mánuði auk bónusa.
Tæpast var gert ráð fyrir því að skuldir þyrfti að greiða tilbaka nema með öðrum lánum.

Fólkið sem í þessu stóð hefur flest verið skipað í aðrar stöður í nýju bönkunum.
Í flestum löndum væri þetta fólk undir rannsókn og með réttarstöðu grunaðra.
Okkur er hins vegar sagt að það megi ekki persónugera vandann!

Kæru vinir, fyrir alla muni mætið á Austurvöll og mótmælið!
Fundurinn byrjar kl. 15 í dag, laugardag og varir einungis 30-40 mínútur.
Það munar um sérhvern mann - alltaf er reynt að gera minna úr þessu í ríkisstjórnarmiðlum.
Takið börnin með en skiljið eggin eftir heima.
Það er ófyrirgefanlegt að sitja heima og gera ekki neitt.

Sjáumst,

Siggi Hr.

Forstjóri verndaður?

Lítil eftirsjá í Jóni

Sjálfstæðismenn keppast nú hver um annan þveran að lýsa því yfir að þeir hræðist ekki kosningar og að lýðræðisástin sé þeim í blóð borin. Ekki sýna þeir þó mikla tiltrú á lýðræðinu fyrst þeir taka það ekki í mál að ganga til kosninga eftir eitt mesta klúður Íslandssögunnar. Skýringin er vitaskuld sú að þeir þurfa að horfast í augu við algjört fylgishrun og hugsanlegan klofning í ofanálag. Jón Gunnarsson gæti t.d. þurft að gera það upp við sig hvorn arminn af flokkshræinu hann muni hengja sig á, þeim ESB sinnaða eða einangrunarsinnaða.

Jón þessi er einna kunnastur fyrir árásir sínar á umhverfisráðherra og kemur það varla mörgum á óvart að honum finnist hún eiga að víkja. Það væri hins vegar að byrja á öfugum enda ef Þórunn segði af sér af öllum syndaselum ríkisstjórnarinnar, Seðlabanka og Fjármálaeftirlits.

Gagnrýnir Björgvin og Þórunni

Auðvitað ekkert upp á Seðlabankann að klaga

Geir er enn við sama heygarðshornið. Ég biðla til helstu sálfræðinga okkar að útskýra þetta heilkenni fyrir þjóðinni. Sjálf þjóðin er haldin Stokkhólmheilkenni segir  hér. Nauðsynleg viðbót er komin við okkar slöku fréttamiðla. Til hamingju með Smuguna.

Ef grein Hallgríms Helgasonar í Fréttablaðinu í dag tekst ekki að vekja Samfylkinguna til meðvitundar þá er næsta víst að fylgishrun bíður þeirra líkt og Sjálfstæðisflokksins þegar kosið verður í vor. Það eru ófáir kjósendur Samfylkingarinnar sem mæta á hverjum laugardegi í kulda og trekki til að krefjast þess að ráðamenn axli ábyrgð. Væntanlega verður 10.000 manna múrinn klofinn um næstu helgi. (Það myndi t.d. samsvara 1,33 milljón manns í Madrid).

Samfylkingin hefur mjálmað um Davíð Oddsson og Seðlabankann á ríkisstjórnarfundum og Alþingi án þess að nokkuð hafi gerst - hann nýtur enn fyllsta trausts forsætisráðherra og stjórnin tekur undir í þeim falska söng. Sjálfur beið ég spenntur í fyrradag eftir því að Samfylkingin tilkynnti um stjórnarslit eftir krísufund sem stóð hátt á þriðju klst. Niðurstaða fundarins var ekki vonbrigði - hún var grafskrift.

Nýja Seðlabankastjórn