Menn flýja ekki fortíð sína svo glatt.

Ofurbloggarinn Öskur Skarphéðinsson óskaði sjálfum sér og öðrum viðstöddum virkjanasinnum til hamingju með að vera að setja lokapunktinn á bak við deilurnar um Kárahnjúkavirkjun. Hann virtist nokkuð kotroskinn karlinn og bara sáttur við sinn hlut, en eins og margir muna studdi hann á sínum tíma ásamt flestum flokkssystkinum sínum mestu hryðjuverk Íslandssögunnar í frægri atkvæðagreiðslu á Alþingi.

Ég er ekki svo viss um að deilunum sé lokið enn. Leyndinni sem hvílir yfir kostnaði við framkvæmdina, hagkvæmni, verðmæti framleiðslunnar (orkuverðinu) og síðast en ekki síst meðferð á starfsmönnum verður ekki haldið um ókomna framtíð. Víst má telja að margt athyglisvert eigi eftir að líta dagsins ljós.  

Sjá einnig hér.

Kárahnjúkavirkjun gangsett

Athugasemdir

[Sævar Helgason, 30.11.2007 kl. 22:12]

Já Sigurður - menn flýja ekki svo glatt staðreyndir.

Þetta Kárahnjúkaverkefni er okkar tæknimönnum sem að því komu til mikils sóma og álitsauka og þeim er í dag við gangsetningu Fljótsdalskirkjunnar (Kárahnjúka) óskað innilega til hamingju með vel unnin störf og við getum verið stolt af þeim- það er ekki málið

Málið er hin pólitíska hlið þessarar ákvörðunar, að ryðjast í þetta verkefni með þeim flumbrugangi sem liggur ljós fyrir. 

Allar frumrannsóknir - hundsaðar- virtir jarðavísindamenn og líffræðingar með yfirburða þekkingu á svæðinu - einskis virtir- mikilsverðum rannsóknaskýrslum stungið undir stól og falið fyrir Alþingi Íslendinga á mikilvægum púnkti- Umhverfisráðherra (Siv F) snýr neikvæðum úrskurði skipulagsstóra við- allt í þágu þessa verkefnis tveggja pólitíkusa sem þá öllu réðu í landinu.

Og nú liggur alveg ljóst fyrir samkvæmt Landsvirkjun- að verkefnið er langt í frá á kostnaðaráætlun- sem var grunnforsenda framkvæmdarinnar-- með öðrum orðum virkjunin verður rekin með verulegu tapi næst 30-40 árin... og við skattgreiðendur borgum. 

Álverið á Reyðarfirði er með allt sitt á þurru og græðir á tá og fingri og flytur hagnaðinn í sína sjóði erlendis.

Svona má aldrei aftur gera... 

[Villi Asgeirsson, 3.12.2007 kl. 06:49]

Afsakið sein viðbrögð. Þessi frétt fór í mig. Ég skil ekki hvernig hægt er að vera stoltur af þessu verki. Væri ég í hans sporum, hefði ég fengið einhvern annan til að setja virkjunina í gang. En það er líka svo að væri ég í hans sporum, hefði ég aldrei stutt virkjunina á sínum tíma.

[Gunnlaugur B Ólafsson, 10.12.2007 kl. 18:55]

Ég er einn af þeim sem var tvístígandi í afstöðu til Kárahnjúkavirkjunar, en hinsvegar harður á móti því að virkja og mynda uppistöðulón við Eyjabakka. Ég horfði til ávinnings fyrir atvinnulíf og mannlíf á Austurlandi. Auðvitað er slíkt mat eins og að bera saman epli og appelsínur. Vart ásættanlegt að þurfa að fórna nokkru í náttúrunni fyrir atvinnuuppbyggingu, eða hvað. Hvenær er fórnin of stór, þar liggur minn efi í málinu. Finnst reyndar að jákvæðu áhrifin á mannlíf, bjartsýni og uppbyggingu á Austurlandi hafi verið meiri en ég bjóst við. Vöruverð orðið sama á Egilsstöðum og Reykjavík með tilkomu Bónus. Húsasmiðjan og fleiri að opna stærri verslanir. Veitingastaðir og fjölbreytt þjónusta. Síðast en ekki síst húsnæðið á þessu svæði er nú metið til verðs.

[Sigurður Hrellir, 11.12.2007 kl. 08:28]

Gunnlaugur, það er óumdeilanlegt að tilkoma álversins og virkjunarinnar hefur haft margvísleg jákvæð áhrif á Mið-Austurlandi. Vandamálið er að þessara jákvæðu áhrifa gætir ekki nema í næsta nágrenni við framkvæmdirnar. Íbúar á syðri og nyrðri hluta Austurlands sátu hins vegar eftir og hafa jafnvel talað um neikvæð áhrif á þeirra svæðum. Þensluáhrifa gætir um allt land við lítinn fögnuð þeirra sem borga húsnæðislánin sín reglulega.

Landsvirkjun fjárfesti fyrir 120.000 milljónir í Kárahnjúkavirkjun. Í viðbót fjárfesti Alcoa fyrir  tugi milljarða í álverinu, ég hef ekki tölur á reiðum höndum. Það er ekkert skrýtið að uppbygging á Mið-Austurlandi hafi verið gífurleg. Þjóðin fórnaði miklum náttúruverðmætum og klofnaði í tvennt í afstöðu sinni. Ég vona bara að bjartsýni Austfirðinga hafi verið alls þessa virði.