Hafa einhver ykkar fengið endurgreitt?

Í Peningamálum SÍ segir orðrétt:

"Fjármálaleg skilyrði heimila eru enn erfið þótt úrlausn á samningum um gengistryggð lán lækki eflaust greiðslubyrði margra heimila, auk þess sem fjöldi þeirra hefur fengið endurgreiðslu á ofteknum greiðslum frá lánafyrirtækjum og niðurfærslu á lánum. Áætlað er að heimili sem tóku lán sem tengd voru gengi erlendra gjaldmiðla fái um 8,5 ma.kr. endurgreidda frá lánafyrirtækjum sem að stærstum hluta komu til greiðslu í lok síðasta árs."

Ég velti því enn fyrir mér hvernig það gat viðgengist í fjölmörg ár að bankar gætu boðið almennum neytendum upp á ólögmæt gengistryggð lán. Allt frá árinu 2001 hefur það staðið skýrt í lögum um vexti og verðtrygginu að slík binding við gengi erlendra gjaldmiðla sé óheimil og mun Eiríkur Guðnason, fyrrverandi seðlabankastjóri hafa barist mjög hart fyrir því að svo yrði. Þeim mun óskiljanlegra er að SÍ og opinberar eftirlitsstofnanir skyldu ekki taka í taumana til að hindra slíkar lánveitingar.

Af lestri Peningamála SÍ mætti helst skilja að heimilin í landinu séu að fá endurgreiddar háar upphæðir vegna oftekinna greiðslna til fjármálafyrirtækja og að mánaðarleg greiðslubyrði umræddra lána muni lækka. Það passar hins vegar ekki við þau dæmi sem ég hef heyrt um þar sem svokallaður endurútreikningur leiðir í flestum tilfellum til enn hærri greiðslubyrði en hinnar ólögmætu gengistryggðu greiðslubyrði. Einnig hef ég enn ekki heyrt af fólki með gengistryggð húsnæðislán sem hefur fengið endurgreitt vegna oftekinna greiðslna. Mig grunar að slíkt fólk sé ekki á hverju strái og lýsi því hér með eftir einhverjum slíkum.

12 milljarða endurgreiðsla

Athugasemdir

[Svanborg (IP-tala skráð) 21.4.2011 kl. 21:49]

Sæll.

Ég get ekki varist að leggja orð í belg í þessa umræðu. Nei ég veit ekki um neinn sem er að fá endurgreiðslu. Mér sýnist greiðslubyrðin bara aukast. Fyrst eru fjármál fólks sett á annan endann, þá hækkar allt sem hækkar getur og síðan eykst greiðslubyrði lána líka eftir endurútreikning tala nú ekki um hjá þeim sem tóku myntkörfulán fyrir 2007. Þetta eru fáránlegir endurútreikningar með fáránlegum vaxtagreiðslum aftur í tímann þegar seðlabankavextir voru himinháir. Hver hefði eiginlega tekið þessi lán með þessum vöxtum? Hvar hefur verið dæmt að breyting á vöxtum eigi að vera afturvirk. Stóð það skýrt í einhverjum af dómunum eða var þetta hugmynd sem fjármálafyrirtæki gripu á lofti eftir dóma þar sem ekki var tekist á um vexti þannig að skýr niðurstaða fengist? Hvar er lagabókstafur fyrir þessari afturvirkni? Væri gott ef einhver gæti bent mér á það þannig að maður sæi það með óyggjandi hætti. Það þurfti ekki að vera lögræðimenntaður til að skilja við fyrsta lestur laganna um verðtryggingu að gengistrygging væri ólögleg.

[Billi bilaði, 21.4.2011 kl. 22:56]

Furðulegt en satt, þá fékk ég rétt tæpar 50.000,- krónur endurgreiddar frá Avant.

Var með 2 bílalán tekin sama daginn. Greiddi annað þeirra upp eftir litla páskahrunið 2008, en var enn að borga af hinu þegar endurreikningurinn fór í gang. Það "skemmtilega" við þetta er að lánin tvö, eins og ég sagði tekin sama daginn, voru með mismunandi framreiknistuðlum. Og lánið sem ég skuldaði enn af fékk á sig dráttarvexti, en lánið sem þeir skulduðu mér af fékk enga dráttarvexti. Alveg hreint yndislegt allt saman.

[Ómar Gíslason, 21.4.2011 kl. 22:57]

Ég tók eftir þessu orði „Endurgreitt" fannst það alveg stórfurðulegt að Seðlabankinn skildi tala á þessum nótum, því samkvæmt orðabók Menningarsjóðs þýðir Endurgreitt = Greiða aftur til baka, borga til baka. Hér fór í hönd dómsmál þar sem t.d. brotin voru lög og brotaþoli er að reikna upp á nýtt þau lán og leiðrétta sem hann gerði.  

[Sleggjan og Hvellurinn, 21.4.2011 kl. 23:04]

ég fékk 100þús kall endurgreitt. Það var bara lagt inná reikninginn minn. þetta var ekki einsinni hátt lán. 450þús kr bílalán. og bara 50% í erlendu gjaldeyri hitt í ísl krónum

[Sigurður Hrellir, 21.4.2011 kl. 23:19]

Takk fyrir þetta. Ég var reyndar að spyrja sérstaklega eftir fólki með gengistryggð húsnæðislán. Bílalánin eru miklu lægri og styttri og því skiljanlegt að fólk hafi verið búið að greiða þau upp á röngum forsendum.

[Páley Geirdal (IP-tala skráð) 21.4.2011 kl. 23:25]

  Sæll

  Ég fékk ekkert endurgreitt..en á að borga fleiri miljónir í seðlabankavexti 4 ár aftur í tímann.

[Sigurður Hrellir, 21.4.2011 kl. 23:38]

Svokallaðar "úrlausnir" á samningunum um gengistryggð lán virðast því í sumum tilfellum vera sanngjarnar fyrir styttri bílalán. Hins vegar eru þær vanhugsaðar og í raun algjörlega út í hött þegar kemur að húsnæðislánum sem tekin voru til a.a. 40 ára.

Alþingi studdist við eitt ákveðið dæmi um 1 milljón kr. lán tekið 2007 þegar þau samþykktu breytingar á lögum um vexti og verðtryggingu sl. desember. Þannig fengu þau út að þetta væri góð lausn fyrir lántakendur. Þrátt fyrir að sumir alþingismenn óskuðu eftir útreikningi á hærri lánum til lengri tíma var ekki orðið við þeirra óskum. Skrýtið? Samt samþykktu 27 þingmenn þessa ótrúlegu lagabreytingu sem margir segja að brjóti í bága við stjórnarskrá, neytendavernd og Evrópurétt.

Dómstólar hafa úrskurðað að gengistryggð lán sem tekin voru í íslenskum krónum og greitt af í íslenskum krónum standist ekki lög. Þau eiga samkvæmt úrskurði að bera óverðtryggða vexti SÍ en það hefur alls ekki verið úrskurðað um greiðsluskyldu aftur í tímann eða afturvirkni. 

[Sigurður Hrellir, 22.4.2011 kl. 01:06]

Ég reyndi ítrekað að koma þeim skilaboðum til alþingismanna að frumvarp Árna Páls gæti haft hrikalegar afleiðingar í för með sér fyrir lántakendur með gengistryggð húsnæðislán. Einnig sendi ég ítarlegt erindi til efnahags- og skattanefndar. Einungis þingmenn Hreyfingarinnar greiddu atkvæði gegn þessu frumvarpi, en margir aðrir sátu að vísu hjá.

Það gefur ekki beint ástæðu til bjartsýni að sjá hvernig vonlausar og óréttmætar lagabreytingar voru keyrðar í gegnum þingið af fulltrúum framkvæmdavaldsins.