Pungfýla

Ég sé hér heilan herskara af miðaldra körlum á ýmsum aldri dissandi fyrsta umhverfisráðherrann sem ekki er viljalaust verkfæri flokksforystu og sérhagsmuna. Þarna hafið þið pólitíkus sem fylgir sannfæringu sinni og reynir að efna þau fyrirheit sem flokkurinn gaf kjósendum í aðdraganda síðustu kosninga.

Umhverfisráðherrann er kona. Er það kannski mergurinn málsins?

Segir Bjallavirkjun ekki koma til greina

Eru peningarnir búnir?

Hvað skyldi Breiðavíkurnefndin sem forsætisráðherra skipaði á síðasta ári fá greitt fyrir sína vinnu? Nú eða dómnefndin sem reiknar út stigin? Er það kannski of viðkvæmt mál fyrir lögfræðingana og sérfræðingana að birta greiðslur til þeirra og brot á persónurétti? Er þetta mál virkilega ekki orðið nógu vandræðalegt fyrir ríkið?

Ég lýsi yfir stuðningi við Breiðavíkursamtökin!!!

Fimm stig gefa 375 þúsund krónur

Heildstætt mat á Samfylkingunni

Samfylkingin er eins og nafnið ber með sér samansafn af ýmsum eldri flokkum. Fyrir síðustu kosningar fór ímyndarherferðin í gang og tókst að krækja í talsverðan atkvæðafjölda út á fögur fyrirheit um ESB inngöngu og "Fagra Ísland". Nú getur fólk loksins farið í heildstætt mat á flokknum og kemst þá líklega að því hvaða öfl þar á bæ eru öðrum yfirsterkari.

Annars bendi ég á nýjan pistil minn um skylt efni.

Stjórnin styður álver á Bakka

Einelti fyrir fullorðna?

Eftir því sem umræðan um stóriðju og virkjanir á Íslandi hefur undið upp á sig heyrist æ oftar að andstæðingar framkvæmdanna þori ekki að tjá skoðanir sínar við fréttamenn. Á síðu 28 í Fréttablaðinu 30. ágúst mátti m.a. lesa:

"Íbúarnir [í Tjörneshreppi], sem Fréttablaðið talaði við, óttast álversframkvæmdirnar og telja þær geta lagt jarðir sínar í eyði. Þeir vildu ekki allir koma fram undir nafni og vísuðu sumir til þess að í sveitinni, sérstaklega á Húsavík, væri því sem næst bannað með lögum að vera á annarri skoðun en sveitarstjórnin. Nokkrir íbúar Húsavíkur höfnuðu einnig viðtalsbeiðni blaðamanns."

Á Vestfjörðum er sömu sögu að segja en þar hef ég heyrt talað um að fólk sé lagt í einelti fyrir að vera á móti olíuhreinsistöð. Í frétt sem birtist á RÚV 4. júní kom m.a. fram sú skoðun að þeir sem væru á móti gætu bara flutt í burtu. Þar kom einnig fram að þeir sem eru á móti hugmyndinni vilji síður tjá sig í viðtali en fylgjendur.

Er virkilega svo illa komið fyrir fólkinu hér á þessu landi að það eigi að troða mengandi verksmiðjum niður í flestum landshornum hvort sem mönnum líkar betur eða verr? Er nóg að alþjóðleg stórfyrirtæki veifi dollarabúntum (eða rúblum) til að sveitarstjórnir kikni í hnjánum og fái glýju í augun?

Á náttúruverndarfólki dynja sífellt ókvæðisorð af ýmsu tagi og er það kallað umhverfisfasistar, öfgamenn sem ekki hlusta á nein rök eða jafnvel hryðjuverkamenn. Vinsælt er að tala um einhverja kaffihúsamafíu sem heldur til í 101 Reykjavík og fer sjaldan austur fyrir Ártúnshöfða nema þá helst til að tína fjallagrös. Í 24 stundum á laugardaginn var kallaði hinn umboðslitli fulltrúi Framsóknarflokksins í borgarstjórn Reykjavíkur framkvæmdastjóra Landverndar "atvinnumótmælanda"!

Að lokum má rifja upp atvik í aðdraganda Kárahnjúkavirkjunar árið 2000 þegar 60 manna hópur úr samtökunum "Afl fyrir Austurland" gekk í Náttúruverndarsamtök Austurlands gagngert til að koma í veg fyrir að ályktanir gegn stóriðju yrðu samþykktar innan félagsins og myndu í framhaldi af því birtast í fjölmiðlum.

Ef þetta er framgangsmáti þeirra sem vilja stóriðju í öllum landshlutum, hver er þá hinn öfgafulli sem ekki hlustar á nein rök? Samkvæmt skoðanakönnun í Fréttablaðinu 24. júní er töluverður minnihluti landsmanna fylgjandi frekari virkjunum fyrir stóriðju, hvort heldur sem spurt er á höfuðborgarsvæðinu eða á landsbyggðinni. Ætlar hávær minnihlutinn sér að þagga niður í meirihlutanum?

 

Birtist í Mogganum í dag, 3. september 2008.

Áfram Kjötborg!

Þessir bræður eru gulli betri og eins og fram kemur í myndinni er þetta engin venjuleg búð. Sjálfur ólst ég upp nálægt Kjötborg í Búðargerði sem Jónas, faðir þeirra rak á meðan hann hafði heilsu til. Þeir Gunnar og Kristján störfuðu þar frá unga aldri og hið létta skap þeirra og einstök þjónustulund hefur fylgt þeim og ætíð verið til fyrirmyndar svo að vægt sé til orða tekið.

Eina sögu kann ég sem örugglega er ekkert einsdæmi. Móðir mín vann á tímabili hjá Hitaveitu Reykjavíkur og sá þar um mötuneytið. Eitt skiptið þegar haldin var árshátíð urðu þær uppiskroppa með bland í vodkann þegar komið var fram á nótt. Fyrirsjáanlegt var að karlarnir færu að drekka óblandað og í öngum sínum hringdi hún heim til Gunnars og bað hann um að redda málunum. Hann birtist skömmu síðar á bíl með nokkra kassa af gosi og vandamálinu var þar með afstýrt. Fáir kaupmenn hygg ég að tækju slíkt í mál.

Myndin um Kjötborg og þá bræður er mjög vel heppnuð og snertir áhorfendur. Vonandi verða góðar móttökur hvatning fyrir þessar ungu kvikmyndagerðarkonur og kaupmennina á horninu. Áfram Kjötborg!

Kjötborg best

Konu í forstjórastólinn!

Það er vissulega skelfilegt til þess að hugsa ef þessu valdamikla starfi verður úthlutað til útbrenndra pólitíkusa. Margir spá því að ferli Árna Matt. sé lokið, ekki síst eftir að hann valdi Þorstein Davíðsson í embætti dómara og fékk bágt fyrir. Það kæmi allavega fáum á óvart ef hann fengi að hvíla sig í forstjórastól Landsvirkjunar.

Hins vegar má alltaf bæta fyrir gamlar syndir og væri ekki úr vegi að minna háttvirta ráðherra ríkisstjórnarinnar á það að þeir eiga að starfa með hagsmuni landsmanna að leiðarljósi en ekki flokkshagsmuni eða eiginhagsmuni. Vonandi sækja margir hæfir einstaklingar um stöðuna og væri vissulega mjög ánægjulegt ef kona yrði fyrir valinu. Konur virðast oft  hafa skynsamlegri afstöðu en karlar þegar nýting á náttúruauðlindium er til umræðu. 

Er það ekki annars iðnaðarráðherrann sem skipar nýjan forstjóra? Hann á allavega tvær umdeildar stöðuveitingar á samviskunni svo að nú þarf heldur betur að reka af sér slyðruorðið.

Starf forstjóra Landsvirkjunar auglýst

Ummæli úr hörðustu átt

Það kemur tæpast á óvart að formaður Framsóknarflokksins skuli nýta sér tækifærið til atkvæðaveiða á Húsavíkursvæðinu/Norðurþingi. Hann og flokkurinn hans bera mikla ábyrgð á þeim samviskulausa hernaði gegn náttúru landsins sem átt hefur sér stað á undanförnum árum og virðist engan endi ætla að taka.

Að ásaka umhverfisráðherrann um "skemmdarverk" hlýtur þannig að koma úr hörðustu átt. Kapp er best með forsjá og tilgangur heildstæðs umhverfismats er einmitt sá að sjá fyrir allar afleiðingar framkvæmdanna frekar enn að skjóta fyrst og spyrja svo. Skyldi Guðni vera að meina það sem hann segir eða mun hann síðar breyta merkingu orða sinna eftir hentugleikum eins og hann hefur nýlega orðið uppvís að á Alþingi?

Framsóknarflokkurinn berst fyrir lífi sínu og framlínumenn þar á bæ hafa helst úr lestinni í stríðum straumum á s.l. tveimur árum. Má þar nefna Halldór Ásgrímsson, Jón Sigurðsson, Jónínu Bjartmarz, Binga og Önnu Kristinsdóttur auk Marsibil og fleiri minni spámanna. Mér segir svo hugur að nokkur örvænting ríki í herbúðum flokksins og tækifærismennska þeirra muni ná nýjum hæðum fram að næstu kosningum.

Kreppa af völdum ráðherra

EKKI FRÉTTIR

Skyldi Framsókn hafa tekist að planta málaliða sínum á skrifstofu mbl.is? Satt best að segja finnst mér harla lítill fréttamatur vera í því að Guðni Ágústsson ætli sér í hringferð um landið. Forvitnilegt verður þó að heyra hvort hann rýkur út í fússi ef einhver dirfist að tala illa um styrkjakerfi landbúnaðarins eða innflutningshömlur á landbúnaðarafurðir.

 

Í nýlegu viðtali við Sverri Stormsker (hér og hér) sýndi Guðni og sannaði að hann er hvorki skarpur né skemmtilegur og algjörlega úr takti við nútímalega hugsun. Líkt og flokksbróðirinn í Ráðhúsi Reykjavíkur fyllir hann skarð brotthlaupins formanns enda flýja flestir viti bornir menn (og dýr) sökkvandi skip. Sjá einnig ágæta færslu Stormskers hér um for(n)manninn og hans fylgifisk.

Guðni í fundaherferð

Mjólkurlaus mjólkurkú

Það er heldur dapurlegt að sjálf "mjólkurkú Reykvíkinga" sé orðin svo illa skuldsett. Skyldu það vera framkvæmdir við Hellisheiðarvirkjun og bygging svörtu hallarinnar á Ártúnshöfða sem hafa kallað á þessar lántökur? REI klúðrið? Veiðileyfi í dýrustu ám landsins fyrir minnislausa borgarfulltrúa og fleiri gæðinga? Ofurlaun helstu stjórnenda? Gerð umhverfismats fyrir virkjun við Bitru/Ölkelduháls sem gerðar voru um 700 athugasemdir við? 500 milljón króna samningur við sveitarfélagið Ölfus gerður til að "liðka fyrir" virkjanaleyfi við Bitru og Hverahlíð?

Brátt verður nýr forstjóri ráðinn til fyrirtækisins. Leynd hvílir um umsækjendur og hægur vandi fyrir nýja  og umboðslausa stjórn fyrirtækisins (D+B) að láta pólitískan gæðing í það sæti frekar en að velja hæfasta umsækjandann. Ef til vill verður eitt helsta hlutverk hans að undirbúa "einkavinavæðingu" á fyrirtækinu?

Því miður verða það Reykvíkingar sjálfir sem þurfa að borga brúsann. Eins og orkuverð hafi ekki verið nógu hátt?

Erfið fjárhagsstaða OR

Að flýja sökkvandi skip...

Valið hjá Marsibil hefur varla verið svo erfitt. Framsókn mælist með rétt um 2% fylgi í Reykjavík en eflaust mun Óskar Bergsson og fleiri vinna markvisst að því að hækka þá tölu til að forða flokknum frá því að þurrkast út. Til þess verður ýmsum brögðum beitt, s.s. fyrirgreiðslupólitík að hætti Framsóknarmanna og sérúthlutuðum stuðningi við hópa og einstaklinga sem líklegir væru til að kjósa flokkinn að launum. Þar munu sameiginlegir hagsmunir borgarbúa þurfa að víkja eins og oft áður.

 

Hið nýja D+B gefur því miður litla ástæðu til bjartsýni. Framsókn stefnir hraðbyri til glötunar og það er alls ekkert sniðugt að setja drukknandi mann við stýrið í mörgum nefndum og ráðum. Borgarfulltrúar úr Sjálfstæðisflokknum hafa líka sýnt ýmislegt annað en styrk og samheldni að undanförnu og því eykur enn á óvissuna í borgarmálunum.

 

Það er ágætt hjá Marsibil að segja skilið við þann villuráfandik flokk sem Framsóknarflokkurinn er orðinn og leggja ekki nafn sitt við þetta valdarán. Hún fylgir þar í fótspor annarrar forystukonu í flokknum Önnu Kristinsdóttur og er þriðja toppmanneskjan af listanum í Reykjavík sem hverfur á braut. Það eru því ekki bara kjósendur sem segja skilið við flokkinn.

Marsibil segir sig úr Framsóknarflokknum