Þjóðin á þing!

Hörður Torfason og Raddir fólksins fóru af stað strax í október með fundi og kröfur sem loksins var öllum fullnægt tæpum 5 mánuðum síðar. Það hlýtur að teljast góður árangur út af fyrir sig en því miður var listinn mun lengri en upphaflega var lagt upp með.

• Enn hefur enginn verið dreginn til ábyrðar fyrir að setja þjóðina á hausinn.
• Sú rannsókn á hruninu sem þjóðin getur sætt sig við er enn ekki hafin.
• Flokkakerfið sem ól af sér spillingu er enn í fullu fjöri og þeirra eigin leikreglur við lýði.
• Kvótakerfið sem að lokum leiddi til efnahagshamfaranna er enn á sínum stað.
• Almenningur er að taka á sig ómældar byrðar vegna fífldirfsku ómerkilegra braskara.
• Neyðarráðstafanir til bjargar heimilunum í landinu eru enn í mýflugumynd.
• Verðtryggingu og ónýtum gjaldmiðli hefur enn ekki verið rutt úr vegi.
• Alþingi er enn í herkví flokkakerfisins og þjóðin ekki komin á þing.
• Nýtt lýðveldi með nýrri stjórnarskrá hefur enn ekki litið dagsins ljós.

Því miður voru margir sem helltust úr lestinni þegar hin ömurlega og siðlausa ríkisstjórn S og D loksins gaf upp öndina. Hörður Torfason var ekki einn af þeim og stofnendur Borgarahreyfingarinnar ekki heldur. Baráttan fyrir Nýju Íslandi mun vonandi færast inn í þingsali!

Hlé á fundum Radda fólksins

Athugasemdir

[Rakel Sigurgeirsdóttir, 21.3.2009 kl. 02:29]

Skorinortur og flottur pistill!

[Sigurður Hrellir, 21.3.2009 kl. 23:21]

Takk fyrir það Rakel og sömuleiðis. Bestu kveðjur til ykkar norðan heiða.

[Rakel Sigurgeirsdóttir, 21.3.2009 kl. 23:50]

Meðteknar

[Arinbjörn Kúld, 22.3.2009 kl. 01:12]

Tek undir orð Rakelar. Baráttuni er ekki lokið. Og takk fyrir bloggvináttuna.

[Sigurður Hrellir, 22.3.2009 kl. 23:53]

Sömuleiðis Arinbjörn. Nú verðum við öll að spýta í lófana því að senn hefst hin raunverulega kosningabarátta. Sem betur fer bætast nýir frambjóðendur í hópinn á hverjum degi.