Stoltir þurfalingar

Fyrrverandi forsætisráðherra kenndi ESB um að hafa níðst á okkur Íslendinum og þvingað til samninga. "Það voru 27 á móti 1" sagði hann í uppgjafartón og sendi enn eina ferðina út þau skilaboð að Ísland ætti ekkert erindi inn svona bandalag Evrópuþjóða sem stæðu svo þétt saman. Sami maðurinn og The Guardian sagði vera á topp 25 lista yfir þá einstaklinga sem bera mesta ábyrgð á efnahagshruni heimsins, sjá hér.

Við höfum hvað eftir annað eftir hrunið fengið þau skilaboð frá fulltrúum ESB að við séum velkomin þar inn og fengjum hraða afgreiðslu. Þannig hefur verið rétt fram sáttarhönd til þjóðar í neyð. Sumir hafa túlkað það þannig að ESB vilji bara nota tækifærið til að gleypa okkur og komast yfir auðlindirnar okkar.

Ég sé ESB sem leið okkar út úr áratugalangri áþján flokkakerfis og klíkuveldis. Kerfis sem þeir hafa hannað sjálfir til að misskipta auði og völdum. Kerfi sem á endanum kom okkur í þá stöðu að vera skuldugasta þjóð í Evrópu. Skuldug þjóð er ekki frjáls og þeir sem bulla um að fullveldi okkar verði fórnað við inngöngu í ESB ættu að hugsa meira um það. Halda menn virkilega að 27 Evrópulönd hafi með bros á vör afsalað sér hluta fullveldis án þess að fá nokkuð í staðinn?

Leið Íslands út úr þessari ömurlega stöðu sem Valhallarklíkan kom okkur í liggur inn í ESB. Við megum engan tíma missa!

 

Fengjum forgang inn í ESB

Athugasemdir

[(IP-tala skráð) 30.1.2009 kl. 08:49]

Þetta er rangt hjá þér, það var akkúrat ESS samningurinn sem kom með þau lög sem gerðu fjármálapúkum færi á að misnota þjóðina svona, og svo viltu meira af því, þetta kallast að mínu viti að hlaupa úr öskunni í eldinn.  Það er hreinlega sárt að hlusta á fólk sem vill ofurselja sig og þjóðina sovésku "lýðveldi" nr 2. Þjóðir eiga að vinna saman án þess að að búa til stórt pappísrsbákn sem sogar til sín spillingu og valdagræðgi. Kv SG

[Hjálmar Bogi (IP-tala skráð) 30.1.2009 kl. 08:50]

Mér finnst það sérstök aðferðarfræði hjá ESB að tilkynna það að við séum sérstakelga velkomnir Íslendingar. Hvers vegna eigum við að fá skjótari afgreiðslu en aðrar þjóðir? Hvers vegna erum við boðin sérstaklega velkomnir á meðan ESB stendur á bremsunni gagvart öðrum þjóðum líkt og austantjaldsþjóðum fyrrverandi? Ég tel sjálfan mig hvorki vera með eða á móti enda ekki hægt að gera upp hug sinn um eitthvað sem maður veit ekki hvað þýðir fyrir land og þjóð. Því er jafn döpur afstaða að halda því fram að við eigum bara að fara í ESB og halda því fram að við eigum ekki að fara. Mitt mat er að Íslands sæki um aðild með ákveðin skilyrði í huga og vinni síðan út frá því. Þessu máli hefur verið stillt upp sem svörtu og hvítu, með eða á móti. Þetta mál er langt um stærra en svo. Én spurningar mínar standa.

[Hjörtur J. Guðmundsson, 30.1.2009 kl. 09:02]

Evrópusambandið þykist ætla að hjálpa okkur í efnahagsmálum en er síðan ekki að hjálpa sínum eigin aðildarríkjum.

The Economist skrifaði á dögunum að ef Ísland sækti um inngöngu í Evrópusambandið eins og staðan í efnahagsmálum okkar er í dag yrði vaðið yfir okkur. Sambandið myndi einfaldlega hagnýta sér veika stöðu okkar út í ystu æsar.

Í frétt Vísir.is um ummæli Olli Rehn er haft eftir honum að innganga Íslands yrði hvalreki fyrir Evrópusambandið. Og þar liggur hundurinn grafinn, við eigum miklar auðlindir sem sambandið vanhagar sárlega um. Evrópusambandið er engin góðgerðastofnun.

[Ragnheiður Gestsdóttir (IP-tala skráð) 30.1.2009 kl. 09:02]

Af hverju væri ESB akkur í að fá okkur inn? Af því að við erum svo æðisleg? Eða sjá einhverjir sér hag í að ráða meiru um okkar mál? Fiskveiðar, orkumál, aðrar auðlindir eins og vatn, landrými, möguleg olía ... myndi þetta ekki fara meira eða minna í hendur "stóru strákanna"? Treystum við þeim betur en okkur sjálfum? - Hvað um framtíðardrauma ESB eins og sameiginlega utanríkisstefnu og herafla? Samrýmist það okkar hugmyndum um Ísland framtíðarinnar? - Við myndum aldrei fá allt fyrir ekkert, það ætti okkur nú loksins að vera farið að skiljast. ESB vill okkur bara inn af því þeir sjá sér hag í því. "Vinarhendur" þess bandalags hafa ekki beinlínis verið á lofti til að tosa í okkur fram að þessu. Hreinsum nú til í okkar eigin spillingarfeni og reynum að koma okkur á lappirnar í stað þess að leita bara að næstu "quick fix"-lausn.

[Haraldur Ólafsson (IP-tala skráð) 30.1.2009 kl. 09:02]

Blessaður Sigurður Hrellir

Þótt sitthvað megi betur fara á Íslandi er samt betra að hugsa sig vel um áður en yfirvaldið er fært í hendur aðila sem láta sig Ísland litlu varða, og það sem meira er: þiggja vald sitt frá kjósendum sem er nákvæmlega sama hvort Ísland flýtur eða sekkur.  Það er ekki erfitt að sjá að slíkt getur endað illa.

Evrópusambandið var annað samband en það er nú að verða þegar þessar 27 þjóðir gengu inn.  Það er erfitt að sjá fyrir sér að þjóðir á borð við Svía og Íra hefðu samþykkt aðild ef Lissabonsáttmálinn með afnámi neitunarvalds, tryggingu á valdi gömlu nýlenduveldanna og viðamiklum hermálakafla hefði verið kominn til sögunnar.

[Jónas Jónasson, 30.1.2009 kl. 09:22]

Wagner : Maðurinn þarf að þjást til að verða vitur.

[Sigurður Hrellir, 30.1.2009 kl. 10:54]

Það er athyglisvert að sjá hversu margir ESB andstæðingar setja hér inn athugasemdir.

Sigurlaug, þú hlýtur að vita betur. ESB og Sovétríkin eru hreint ekki sambærileg. Þú bendir hins vegar réttilega á að EES samningurinn er hreint ekki gallalaus. Vilt þú segja honum upp?

Hjálmar Bogi, ástæðan fyrir skjótri afgreiðslu er annars vegar sú að við höfum verið á þröskuldi ESB í 15 ár og tekið upp stóran meiripart af regluverkinu. Hin ástæðan er sú að við eigum vinveittar þjóðir í áhrifastöðum sem vilja hjálpa til. Það er enginn vafi í mínum huga að þeim gangi gott eitt til.

Hjörtur, þú ert í stjórn Heimssýnar ásamt Ragnari Arnalds, Bjarna Harðarsyni og fleiri hörðustu andstæðingum ESB. Þið eruð óþreytandi að benda á að sambandið vilji ásælast auðlindir okkar. Ég óska eftir umræðu um það sem ESB gæti gert fyrir okkur. Af hverju nefnið þið aldrei stoðkerfi ESB við hinar og þessar framkvæmdir? Á Kanaríeyjum (einnig jaðarsvæði) þar sem ég var nýlega, á margþætt uppbygging sér stað með fjármagni frá ESB. Það eru lagðir vegir og flugvellir, útbúnir þjóðgarðar, lagður grundvöllur að atvinnuuppbyggingu (sérstaklega á sviði nýsköpunar og í anda sjálfbærni) auk ýmissa sérverkefna. Ferðir til og frá landinu yrðu væntanlega niðurgreiddar fyrir þá sem búa hér og svo mætti lengi telja.

Ragnheiður, ESB vill fá okkur inn því að þau vilja losa sig við EES samninginn og botna hreinlega ekkert í því af hverju við stígum ekki skrefið til fulls. Við fáum heilu lagabálkana senda á faxi og verðum að innleiða þá án þess að hafa nokkuð um það að segja. Svo erum við með ónýtan gjaldmiðil sem í augnablikinu er bæði með kút og kork.

Haraldur, það er vægt til orða tekið hjá þér að "sitthvað megi betur fara á Íslandi". Við búum einfaldlega í helsjúku þjóðfélagi þar sem forréttindaklíkur sitja við völd og maka krókinn. Þessir sömu aðilar vilja síst af öllu missa tökin sem innganga í ESB hefði í för með sér og gera því allt sem þeir geta til að halda þjóðinni áfram í heljargreipum.

Jónas, ég þjáist og vitkast. Kemur þó hægt gangi.

Sigurður nafni, ég skal kynna mér það sem þú bentir á.

Guðrún, ef þú lest mína færslu og þessa athugasemd getur þú varla haldið því fram að ég færi engin haldbær rök fyrir því að ganga til aðildarviðræðna. Fyrst og síðast tel ég að þjóðin eigi að ákveða það sjálf í þjóðaratkvæðagreiðslu og það sem fyrst. Það eru misvitrir stjórnmálamenn og sjálfskipaðir "besserwisserar" sem hafa staðið í vegi fyrir því í 15 ár og að mínu mati óbeint valdið hryggilegu tjóni sem erfitt verður að bæta. Af hverju rökstyður þú ekki sjálf að hafa eigi vit fyrir okkur í þessu mikilvæga máli?

[Ragnheiður Gestsdóttir (IP-tala skráð) 30.1.2009 kl. 22:52]

Já, við höfum innleitt mikið af lagabálkum ESB, en athugaðu hvaða lög við höfum EKKI innleitt. Það er svo oft litið á magnið af lagatextum en ekki innihaldið. Það sem við þyrftum að samþykkja er af svolítið öðrum toga en það reglugerðaverk sem búið er að taka upp. Þegar allt var að hrynja hér voru Brusselmenn víst að endurskoða reglurnar um hversu mikil beygja er leyfð á gúrkum og gulrótum svo þær teljist ætar innan ESB ... svo þeir una sér við ýmislegt smálegt, en ég hef meiri áhyggjur af stærri málunum. Viljum við sameiginlega utanríkisstefnu og herafla? Viljum við að ESB ákveði hvort hér eigi að halda uppi landbúnaði? Viljum við að þeir ákveði að hér sé best að einbeita sér að stóriðju?

[(IP-tala skráð) 31.1.2009 kl. 11:53]

Já Sigurður ég veit betur, en þetta var svona líking  á því sem ég tel að  stefni  í að  óbreyttu hjá ESB.   ESB mun hins vegar splundrast eins og Sovét gerði, það er bara tímaspursmál, og það var mín meining.  Ég er á því að það þurfi að  endurskoða ESS samninginn, hann er stórgallaður eins og sést á því hverning komið er fyrir okkur, og ef það tekst ekki, þá já segja honum upp.