Hvernig hljóma jarðvarmavirkjanir?

Eins og ég minntist á í síðasta bloggi mínu fór ég í blíðskaparveðri upp á Hellisheiði nú um helgina. Smá útúrdúr tók ég á leiðinni til að skoða svonefnda Hellisheiðarvirkjun í návígi. Það sem vakti mesta furðu mína voru ekki forljótar byggingarnar eða leiðslurnar sem lagðar hafa verið á ótrúlega áberandi hátt víða um svæðið. Heldur ekki háspennumöstrin og línurnar sem þeim fylgja. Þetta hafði ég allt séð áður úr fjarska. Það var hins vegar hávaðinn sem fékk stærstan skerf af athygli minni.

Nú er það svo að útivist er í mínum huga samofin kyrrð og ró. Að vísu get ég vel sætt mig við þau hljóð sem óhjákvæmilega fylgja ýmsum náttúrulegum fyrirbærum, en þegar þau eru mögnuð upp þannig að maður bókstaflega þarf að halda fyrir eyrun er útséð með að ánægjunni hafi verið spillt. Jarðvarmavirkjunin við Kolviðarhól er ekki bara lýti á umhverfinu, heldur spillir hún stóru svæði alls staðar í kring með yfirþyrmandi hávaða. Auk þess hafa þessir Orkuveitukarlar fundið hjá sér þörf til að setja upp skilti sem meinar fólki aðgang (sjá mynd hér fyrir neðan).

Ef virkjunaráformin við Ölkelduháls (Bitruvirkjun) ná fram að ganga verður mjög stóru svæði stolið frá útivistarfólki og ferðamönnum. Ég vona innilega að blóðið fari að renna Íslendingum til skyldunnar og þeir að þeir vakni af Þyrnirósarsvefninum. Það er of seint að iðrast þegar framkvæmdirnar eru vel á veg komnar.

Telja að virkjun muni spilla ómetanlegri náttúruperlu

Athugasemdir

[Katti (IP-tala skráð) 31.10.2007 kl. 13:14]

Alveg sammála! Endilega farið á siðuna http://www.hengill.nu , kynnið ykkur málið og ef þið eruð sammála náið í brefið sem má nota til að senda inn athugasemd við s.k. Bitruvirkjun, sem á að risa rétt vestan við Ölkelduháls. Ítarlegri upplýsingar og frabæra myndir á http://photo.blog.is/blog/photo/entry/351625/

Baráttukveðjur,

Katti Wiklund

[petra Mazetti (IP-tala skráð) 31.10.2007 kl. 13:33]

Alveg rétt - þetta hefur áhrif á margan hátt! Mér sýnist á vef orkuveitunnar að þar eru menn með aðra skoðun á umhverfisáhrif Hellisheiðarvirkjunar!

"Það er of seint að iðrast þegar framkvæmdirnar eru vel á veg komnar": Tek undir þetta líka - þess vegna er verið að  vekja athygli á þessu máli núna! Athugasemdir má skila til skipulagsstofnunar þar til 9. nóv, einnig á sveitarstjórn eftir að auglýsa breytingu á aðalskipulagi (frá útivistarsvæði í iðnaðarsvæði!) og þá er sex vikna frestur til að gera athugasemd við það. sjá www.hengill.nu og á http://photo.blog.is/blog/photo/ er gott kort sem gefur skýra mynd af svæðinu.