Sumir eru jafnari en aðrir

Á Íslandi ganga ræningjar og landráðamenn lausir og reka tunguna framan í skattpínda og skuldum vafna landa sína. Klíka með tök innan gömlu bankanna sem sópaði að sér lygilegum fjármunum, tók "lán" í stórum stíl sem voru send til fjarlægra landa og afskrifuð samdægurs. Leiðtogi þessarar klíku segir nú kotroskur að hann muni höfða skaðabótamál gegn þeim sem reyna að endurheimta góssið. Svo maður vitni nú í mæðulegan forsætisráðherrann:

"Ég held að í þessu skelfilega hruni sem þjóðin varð fyrir þá sé aldrei hægt að tala um neinn jöfnuð eða réttlæti ég held bara að við stöndum frammi fyrir því." (*)

Er ef til vill kominn tími á að fólk taki sjálft lögin í eigin hendur?

 

(*) Úr viðtali í Síðdegisútvarpi Rásar 2, 3. desember, í umræðu um skuldavanda sumra heimila.

 

Höfðar líklega skaðabótamál

Athugasemdir

[Óskar Helgi Helgason (IP-tala skráð) 14.12.2010 kl. 20:12]

Heill og sæll Sigurður; jafnan !

Vel; að orði komist hjá þér, sem vænta mátti, svo sem.

Með kveðjum góðum; úr Árnesþingi /

Óskar Helgi

[Gunnar Waage, 14.12.2010 kl. 20:20]

Best þykir mér frá Pálma Haralds sem segir að; "Málið hafi valdið honum gríðarlegu andlegu og fjárhagslegu tjóni."

Er það hægt?

[Flosi Kristjánsson, 14.12.2010 kl. 20:46]

Niðurlagsorð þín eru skiljanleg út frá öðru sem fram kemur í pistlinum. Ef það er almenn skoðun fólks að brotlegir athafnamenn geti með vogarafli fjármuna sinna snúið niður ákæru- og dómsvaldið, þá er hætt við að maður fari að sjá rauða málningu aftur. Það er ekki geðsleg framtíðarsýn.

[Sigurður Hrellir, 14.12.2010 kl. 21:05]

Flosi, ég er enginn sérstakur talsmaður óeirða og uppþota, og Íslendingar virðast vera mun prúðari en margar aðrar Evrópuþjóðir - Ítalir eru nærtækt dæmi. Hins vegar er það nú svo að sporin hræða, sbr. Baugsmálið, og ég óttast að langlundargeð íslensku þjóðarinnar séu einhver takmörk sett.