Horfum til tækifæranna

Tillaga um að  Ísland dragi umsókn sína um aðild að Evrópusambandinu til baka yrði því miður hvorki þingi né þjóð til framdráttar. Eins og sjá má hér er útilokað að tillagan fengist samþykkt en samkvæmt minni talningu myndu líklegast 36 þingmenn leggjast á móti henni og einhverjir sitja hjá.

Það er staðreynd að aðildarviðræðuferlið við ESB er formlega hafið. Hins vegar eru hinar raunverulegu aðildarviðræður enn sem komið er ekki hafnar og því full ástæða til að móta vel þær óskir sem Ísland mun leggja fram í þeim viðræðum. 

Ég skora á þingmenn að nýta fremur tíma sinn til að leggja þessum aðildarviðræðum lið en að nota hvert tækifæri sem gefst til að tala gegn þeim og senda út þau skilaboð að við höfum ekkert við ESB að ræða.

Sjálfur sting ég upp á því að Ísland geri kröfu um "loftbrú" milli Íslands og Evrópu líkt og aðrir eyjaskeggjar innan ESB njóta. Íbúar á Kanaríeyjum borga t.d. einungis hálft fargjald þegar þeir ferðast á milli Spánar og Kanaríeyja. Mér finndist það sanngjörn krafa að Íslendingar sem aðildarþjóð væru ekki einangraðir hér sökum hárra fargjalda og í verri aðstöðu til að ferðast innan ESB.

Einnig sting ég upp á að hér yrði komið á fót miðstöð náttúruauðlinda innan ESB með áherslu á sjálfbæra nýtingu og að settar yrðu upp rannsóknarmiðstöðvar á  sviðum sjávarlífríkis og jarðhita.

Óbreytt afstaða til ESB

Athugasemdir

[Ingibjörg Guðrún Magnúsdóttir, 1.9.2010 kl. 11:35]

Þessi Ríkisstjórn er vanhæf og á að koma sér frá. Það á að vera í höndum okkar allra Íslendinga að ráða för með þessa ESB aðild. Hvernig það er búið að standa að þessu er til háborinnar skammar fyrir okkur Íslendinga, við kusum Ríkisstjórn til að slá skjaldrborg utan um fallandi heimilin og fyrirtæki og hvað er búið að gerast þar... kusum Ríkisstjórn sem lofaði að hafa allt upp á borðum og hvernig stendur það dæmi.. kusum Ríkisstjórn til að tryggja það að það sé ekki okkar að borga óreiðureikninga eins og Icesave en hvað er búið að gerast þar núna tæp 2. árum seinna... Þjóðinni er fórnað fyrir aðild að ESB og það get ég ekki verið sátt við vegna þess að mér finnst við Íslendingar meira virði en svo að það sé farið með okkur svona án okkar vilja..

[Sigurður Hrellir, 1.9.2010 kl. 13:22]

Ingibjörg, þó ég geti vissulega tekið undir með þér að ríkisstjórnin hafi staðið sig ákaflega illa í að verja heimilin og mörg fyrirtæki í landinu, þá get ég ekki séð að þjóðinni sé fórnað fyrir ESB, nema þá í þeim skilningi að margir Íslendingar hafi flúið land og sest að í Evrópu.

Hugnast þér ekki að þjóðin greiði atkvæði um aðildarsamning í þjóðaratkvæðagreiðslu? Viltu frekar láta háværan hóp fólks stöðva ferlið án þess að fá staðreyndir upp á borðið og að hér haldi áfram þras um það hvað hefði gerst EF við hefðum fengið samning til þess að vega og meta? Trúir þú því virkilega að hér breytist eitthvað til batnaðar ef bláa höndin nær tökum á stýrinu og allt falli í sama farið?