Auðlind til sölu - 30% út, afgangurinn eftir eigin smekk

Það er afar sorglegt til þess að vita að fólk skipað í nefnd að hálfu stjórnmálaflokka skuli með einbeittum vilja hafa greitt fyrir því að erlendur fjárfestir með vafasamt orðspor skuli hafa fengið að kaupa sig inn í íslenskar náttúruauðlindir í gegnum skúffufyrirtæki. Það gerðist á yfirvegaðan hátt með atkvæðum 3ja nefndarmanna gegn atkvæðum 2ja án þess að stjórnarskrárvarin takmörkun á viðskipti með náttúruauðlindir hafi litið dagsins ljós. Lagaleg álit skiptu hér greinilega litlu máli en pólitískur vilji því mun frekar.

Ross Beaty, eigandi Magma energy er m.a. í forsvari fyrir Pan American Silver Corp. sem arðrænir ríki í S-Ameríku og misnotar verkafólk, sjá hér. Það kemur því ekki á óvart að hann hafi nýtt sér vafasamar leiðir til að fjármagna kaupin í HS-orku, eða öllu heldur þau 30% kaupverðsins sem hann þurfti að standa skil á, sjá hér. Restina fékk hann víst að láni hjá OR með tryggingu í bréfunum sjálfum sem er kunnuglegt viðskiptamódel hér á Íslandi, sérstaklega fyrir Hrunið.

Hér má lesa ágætan pistil Sigrúnar Davíðsdóttur frá því í fyrrahaust en þar er m.a. minnst á raforkutilskipun ESB sem einhverjir lagalegir álitsgjafar töldu að kæmi í veg fyrir að hægt væri að stöðva viðskiptin. Annað hefur komið í ljós ef marka má nýtt álit Elviru Méndez Pinedo auk þess sem að ríkið gæti væntanlega tekið hlutinn eignarnámi á grundvelli 72. gr. stjórnarskrárinnar. Hins vegar er pólitískur vilji greinilega sá að selja auðlindina hvað svo sem að baki býr.

Mér hefur lengi verið það ljóst að Samfylkingin berjist fyrir náttúru og umhverfi í orði en ekki á borði. Þess vegna finnst mér það dapurlegt að margir ágætir félagar mínir og baráttusystkin til margra ára skuli ekki hafa erindi sem erfiði í að vinna helstu málum sínum framgang þar sem ákvarðanir eru teknar innan flokksins.

Það að Framsókn og Sjálfstæðisflokkur skuli hafa stutt þessa dapurlegu auðlindasölu kemur varla á óvart. Án nokkurns vafa eru ákveðnir aðilar að mala gull með þessu móti. Ekki er það til að bæta trúverðugleikann að nefndarmönnum var bannað að tjá sig við fjölmiðla um niðurstöðuna og setur það spillingarstimpilinn á sköpunarverkið.

Ég þakka fulltrúum Borgarahreyfingarinnar og VG í nefndinni fyrir að standa fastar fyrir og greiða atkvæði gegn þessum fordæmisgefandi og svíðingslega gjörningi.

Samningur um kaup á íslenskri auðlind (íslensk þýðing)

Fara yfir lög um fjárfestingu