Hvar er trúverðugleikinn???

Jónína spyr hvar trúverðugleikinn sé? Það skýtur skökku við að hún hafi áhuga á að vita það. Trúverðugleiki hefur ekki verið sterkasta hlið Framsóknarmanna um langa hríð en öðru máli gegnir um spillingu. Jónína hefur nú bætst við stóran hóp þeirra flokkssystkina sinna sem eru með svartan blett á tungunni. Það er synd.

Finnst fólki virkilega ekki þörf að endurnýja áhöfn þjóðarskútunnar? Íslandshreyfingin er valkostur fyrir hina sem telja þörf á því. Kynnið ykkur heiðarlegt fólk á www.islandshreyfingin.is

Kastljós svarar Jónínu

Þrælalandið Ísland?

 

Nú hefur það komið í ljós sem búast mátti við. Erlent starfsfólk við Kárahnjúka hefur verið misnotað! Vilja Íslendingar halda áfram á þessari línu, þ.e. að stinga höfðinu í sandinn og láta eins og sér komi þetta ekki við. Það er jú erlent fyrirtæki (Impregilo) með vægast sagt vafasamt orðspor sem lætur fólkið starfa við ömurlegar starfsaðstæður, en ábyrgðin liggur samt hjá íslenskum ráðamönnum. Ætlar fólk að þegja og láta sem ekkert sé?

Íslandshreyfingin vill að komi verði fram við innflytjendur og erlent verkafólk eins og mönnum sæmir! www.islandshreyfingin.is

 

 

Of seint gripið til aðgerða í göngum við Kárahnjúka

Hvað Mogginn sér

Torkennileg ókyrrð gerir nú vart við sig í sálarkitru Moggaritstjórnarinnar. Í þrjá daga í röð hafa hinir verðmætu dálksentimetrar Staksteina verið nýttir til að hnýta í Ómar Ragnarsson og Íslandshreyfingu hans. Hvað gæti valdið þessu? Eru það óvæntar áherslur Ómars og félaga í Evrópumálum? Eru það hugmyndir þeirra um að leyfa takmarkaðar veiðar smábáta í trássi við kvótagreifana? Er það ef til vill sú óvænta staðreynd að Íslandshreyfingin birtist ekki sem sá harðsvíraði eins-máls-flokkur sem margir höfðu talið? Hvað sem öðru líður virðist Mogginn sjá eitthvað sem Capacent Gallup og co. koma ekki auga á. Hvort það er óttinn við að einhverjir sanntrúaðir Sjálfstæðisflokksmenn gangi úr skaftinu eða tortryggni á það sem sumir hafa nefnt hægri-græna stefnu er ekki gott að segja.

Hjörleifi svarað.

Í Fréttablaðinu í dag, föstudaginn 13/4 birtist grein eftir hinn vígamóða Hjörleif Guttormsson þar sem hann fer þess á leit við Ómar Ragnarsson og Íslandshreyfinguna - lifandi land að þau hætti við margboðað framboð sitt til Alþingis. Hjörleifur er vel þekktur fyrir baráttu sína gegn álverum og virkjanaæðinu sem nú geisar sem aldrei fyrr og hefur vissulega verið drjúgur í þeirri baráttu. En grein hans er því miður ekki uppbyggilegt innlegg.

Íslandshreyfingin - lifandi land var stofnuð í þeim tilgangi að fjölga í græna liðinu. Henni er ætlað að vera málsvari þeirra sem láta sig umhverfismál miklu skipta en geta af ýmsum öðrum ástæðum ekki kosið Vinstri græna. Eitt helsta baráttumál hennar er að styðja við nýsköpun og frumlega atvinnustarfsemi aðra en þá sem skaðar land og þjóð. Hún leggur áherslu á sjálfbæra nýtingu auðlindanna og kýs gæði umfram magn og fjölbreytni umfram einsleitni. "Græn-vöxtur" er góðkynja hagvöxtur. Hún styður heils hugar við einkaframtakið og er á móti auknum skattaálögum. Hún vill sjá blómlega starfsemi í öllum byggðum.

Framtíðarlandið ætlaði sér svipaða leið, en í kosningu meðal félagsmanna varð niðurstaðan sú að ekki skyldi bjóða fram til Alþingis. Hjörleifur beitti sér þar mjög einarðlega gegn hugmyndinni og talaði oft og lengi á móti henni. Það má því vera ljóst að hann vill ekki undir neinum kringumstæðum sjá annað stjórnmálaafl sem leggur höfuðáherslu á umhverfismál. Heldur vill hann trúa því að allir svarnir umhverfissinnar muni styðja VG hvar svo sem önnur áherslumál þeirra liggja.

Gallinn við þetta útspil Hjörleifs er sá að hann er að spilla fyrir vinnu okkar við framboðið. Síðustu daga og vikur hefur verið unnið að því fullum fetum að koma saman trúverðugri stefnu og málefnaskrá. Það hafa verið haldir fundir víða um land með fulltrúum hins nýja framboðs. Síðast í gær var mjög spennandi fundur í Iðnó þar sem Arthur Bogason formaður Landssambands smábátaeigenda og Friðrik Arngrímsson framkvæmdastjóri LÍÚ töluðu fyrir sínum áherslumálum og svöruðu spurningum frá gestum í sal.
Mikill tími hefur farið í að finna frambærilegt fólk til að leiða alla framboðslistana. Þeirri vinnu er nú að mestu lokið og verða listarnir kynntir nú um helgina. Vonumst við til að það slái á allar úrtöluraddir í eitt skipti fyrir öll.

Að bjóða fram til Alþingis er lýðræðisleg leið til þess að hafa áhrif á mikilvæg mál og ná fram breytingum. Það er líka áhættusöm leið því að aldrei má ganga út frá því sem vísu að nýtt framboð komi fólki inn á þing. Aðrar leiðir eru vissulega fyrir hendi, t.d. að "styrkja" stjórnmálaflokka og fá þess í stað sporslur og fyrirgreiðslur líkt og tíðkast hér í ríkum mæli. Einnig er hægt að fara út í yfirtöku á eldri flokkum og breyta þeim í sérhagsmunasamtök án þess að sauðtryggir kjósendur hætti stuðningi sínum. Loks er hægt að beita þingmenn þrýstingi líkt og Framtíðarlandið gerði með auglýsingaherferð og undirskriftasöfnun sinni. Hjörleifi hugnast sú leið trúlega best en við sem stöndum að Íslandshreyfingunni - lifandi landi teljum að líklegast til árangurs sé að koma okkar fólki inn á þing. Annars værum við ekki að þessu.

Að ætla að gera Ómar og Íslandshreyfinguna ábyrga fyrir því ef ríkisstjórnin fær aukinn byr í seglin er afar ósanngjarnt og ætti Hjörleifur að hafa hugsað sig um tvisvar áður en hann ákvað að ráðast opinberlega gegn okkur. Hins vegar eru 4 vikur til kosninga og mjög margir kjósendur enn óákveðnir. Við munum kynna okkar málstað eins víða og unnt er og erum þakklát öllum þeim sem aðstoða okkur í því sambandi.

Af hverju biðlar Hjörleifur ekki frekar til þeirra umhverfissinna sem kosið hafa Sjálfstæðisflokk og Framsóknarflokk og hvetur þá til að styðja Íslandshreyfinguna?

Er Sjálfstæðisflokkurinn trúfélag?

Ég verð nú að segja eins og er að ég skil ekki alveg hvað þetta fólk í Reykjavík S. er að pæla. Eru menn yfirleitt mjög sáttir við það að Sjálfstæðisflokknum hafi einungis tekist að koma 7 af 20 stefnumálum sínum frá því fyrir síðustu kosningar í gegn? (Sjá Fréttablaðið 7.4.2007 bls. 32). Er fólk sátt við að íbúðalánin þeirra eru þau dýrustu í Evrópu og hafa rokið upp vegna stefnu stjórnarinnar í uppbyggingu stóriðju? Ef svo er, þá eiga menn ekki neitt betra skilið.

VG og Sjálfstæðisflokkur bæta við sig fylgi í Reykjavík suður

R.I.P.

Hvað skyldu margir trúa orði af því sem Framsóknarflokkurinn lofar? Ætli Jón trúi því sjálfur? Eru 12 ár ekki nóg? Þessi sjálftökuflokkur hefur fengið að ráðskast með land og þjóð í skjóli stóra bróður án umboðs frá kjósendum. Hvíl í friði...

Framsóknarmenn boða áframhaldandi uppbyggingu atvinnulífsins

Ætli Jón hafi frétt af þessu?

Það liggur við að maður sé farinn að vorkenna þeim hjá Alcan eftir að úrslit kosninganna urðu ljós. Og þó. Næsti leikur þeirra virðist vera að kanna hvernig þeir geti þröngvað e-s konar stækkun upp á íbúa SV-hornsins þrátt fyrir vilja fólksins. Iðnaðarráðherrann virðist ekki vera með athyglisgáfuna í lagi þegar hann sér lítil merki um stóriðju á næstunni. Skyldi hann yfirleitt vera vel inni í nokkrum sköpuðum hlut? 

Alcan íhugar að reisa álver á Keilisnesi

3/3

Ég held að 3 af þessum flokksleiðtogum geti vel við unað og 3 ættu alvarlega að hugsa sinn gang. Reyndar á ég bágt með að skilja þessa ánægju með Geir. Hann er einfaldlega allt of litlaus fyrir minn smekk og orðheppni verður seint talin hans sterkasta hlið

Geir nýtur mestra vinsælda

Þyrnirós, ertu loksins vöknuð?

Framtíðin er skyndilega bjartari fyrir ungt fólk í Hafnarfirði og á
landinu öllu. Takk fyrir, öll þið 6382 frábæru manneskur og sér í lagi
þau 88 sem gerðu gæfumuninn... Hver sem þið eruð, skál fyrir
framtíðinni! Nú er von um að álversmartröðin taki einhvern enda og
íslendingar vakni upp af Þyrnirósarsvefni á 21. öldinni. 

Hafnfirðingar höfnuðu stækkun álversins

Til hamingju Íslandshreyfing

Svo virðst sem að Jón Magnússon og "Frjálslyndi" flokkurinn (sic!) hafi ærna ástæðu til að draga djúpt andann áður en þeir fara endanlega í kaf. Íslandshreyfingin er komin á fljúgandi siglingu strax í fyrstu lotu og sækir augljóslega hluta af fylgi sínu til Jóns og co. Sjálfur ætti Jón kannski að fara að stilla betur sína eigin strengi og huga að öðrum áherslum en að níða niður heiðarlegt og hugað fólk sem flytur hingað á hjara veraldar í von um betra líf.
Áfram Íslandshreyfing, ykkar erindi er brýnt!

Margrét: Stjórnmál 21. aldar snúast um mannauð, hugvit og nýsköpun