Nefnum hlutina sínu réttu nöfnum.

Það kemur lítið á óvart að flokkarnir skuli hafa "skiptar skoðanir" um þetta mál enda fara hagsmunir almennings og hagsmunir flokkanna lítt saman í flestum málum sem tengjast lýðræðisumbótum. Nægir að nefna margboðað stjórnlagaþing sem varla verður svipur hjá sjón í meðförum þingsins ef það verður þá yfirleitt nokkuð úr því. Svæfingarmáttur þingnefndanna er mikill eins og sagan segir okkur og ekki kæmi mér á óvart að umrætt "frumvarp um persónukjör" sigli inn í draumalandið.

Reyndar er rétt að halda því til haga að hér er hreint ekki verið að tala um persónukjör heldur listakosningu eins og dómsmálaráðherra sagði orðrétt þegar hún mælti fyrir frumvarpinu 24. júlí sl.:

"Ég legg áherslu á að með þeim breytingum sem lagðar eru til í frumvarpinu er ekki með neinum hætti hróflað við listakosningu og hlutfallskosningakerfinu hér á landi. Kjósendur munu eftir sem áður kjósa tiltekinn lista og telst atkvæðið listanum til tekna óskipt til úthlutun sæta til listans í réttu hlutfalli við úrslit kosninganna."

Væri ekki rétt að kalla hlutina sínum réttu nöfnum? Því miður apa fjölmiðlar oft á tíðum gagnrýnislaust vitleysuna upp eftir ráðamönnum og setja engin spurningamerki við orðanotkun þeirra og hugtakarugling.

Hér á landi hefur orðið alvarlegur trúnaðarbrestur á milli fólksins í landinu og ýmissa stofnana samfélagsins. Skortur á trausti er mikið vandamál og starfandi stjórnmálaflokkar eru þar alls ekki undanþegnir. Sú hugsun að fulltrúalýðræðinu sé best fyrir komið í hefðbundnum stjórnmálaflokkum á varla upp á pallborðið hjá almenningi eftir allt það sem á hefur dunið hér síðustu misserin. Í því ljósi þarf nauðsynlega í nýjum kosningalögum að gefa kjósendum fullt frelsi til að velja sér fulltrúa eftir því hvaða einstaklingum þeir treysta.

Það er hreint út sagt hlægilegt að flokkarnir skuli enn og aftur setja fótinn fyrir hagsmuni almennings í landinu. 

Persónukjörið er ólíklegt

Athugasemdir

[Jón Steinar Ragnarsson, 29.9.2009 kl. 11:25]

Það er þverpólitísk samstaða um eitt og hefur alltaf verið, en það er að tryggja þeim setu sem sitja. Verðum við bara ekki að fara aftur til grikkjanna til að finna út hvað er að? Hver grundvallaratriði lýðræðis eru? Demo=fólkið/people Kratos: Völd/power. Lýðræði þýðir að allir séu jafnir fyrir lögum og að allir eigi jafnan rétt til valda, Málfrelsi og tjáningarfrelsi. Hmmm? Kannski vantar eitthvað upp á það?  Í Aþenu til forna var  almennum fulltrúum borgara leyft að tala og kjósa á þingi. Það væri ágæt aðfeð til að tengja þingið líðandi stundu, þvílengst af er það ekki að fjalla um mál, sem réðu kjöri. (Hér er það aukaatrið hvort það sem ráði kjöri, sé yfirleitt stefnan)

Kannski þyrfti að koma á þingi heimspekinga, sagnfræðinga og stjórnmálafræðinga til að forma einhverja vitræna mynd á þetta.

[Hjörtur Hjartarson (IP-tala skráð) 29.9.2009 kl. 15:02]

Sæll Siggi.

Fín umsögn. Andstaða hinna "tryggu" var fyrirsjáanleg. Til hvers að eiga flokk ef kjósendur ráða því hvort maður kemst á þing eða ekki?