Skortur á lagalegu innsæi?

Ég er svo heppinn að borða morgunmat á hverjum degi með konu sem er doktor í Evrópurétti. Þess vegna fæ ég stundum útskýringar sem maður hefur á tilfinningunni að íslenskir stjórnmálamenn hafi ekki eða vilji í það minnsta ekki láta til fjölmiðla.

"Það er svekkjandi að ekki skyldi koma út úr þessu það sem til stóð" á Árni Mathiesen að hafa sagt. "Við hefðum viljað fá lagalegan grundvöll undir þetta, en vinnubrögðin voru þannig að það var ekki hægt."

Honum finnst það ekki ásættanlegt að gerðardómurinn eigi að skoða aðgerðir íslenskra stjórnvalda í fjármálakreppunni og gefa álit á neyðarlögunum. Varla er hægt að horfa fram hjá því þegar metnar eru forsendur þess að Ísland fylgi ekki skuldbindingum EES samningsins. Ef taka á tillit til sérstakra neyðaraðstæðna á Íslandi þá stenst það vitanlega ekki skoðun að neyðarlögin séu ekki hluti af þeim.

Að niðurstaða gerðardómsins væri ekki bindandi virðist líka koma Árna á óvart. Álit ECJ (Evrópudómstólsins) nr.1/91 segir að ECJ hafi síðasta orðið í túlkun laga fyrir ESB löndin. Þar af leiðandi hlýtur téður gerðardómur að skila úrskurði sem ekki telst bindandi fyrir ECJ. Annað væri óhugsandi og Ísland fær m.ö.o. enga sérmeðferð.

Það hvarlar að manni að hér sé enn ein smjörklípan á ferð. Nú á að kenna ESB um hvernig málum er komið á Íslandi.

Deilur vegna Íslands í gerðardóm

Athugasemdir

[Jón Steinar Ragnarsson, 13.11.2008 kl. 09:44]

Hvenig má annað vera Siggi þegar enginn botnar í þessu Orwellíska skrifræði, sem ESB er? Menn áttuðu sig ekki einu sinni á að þegar skrifað var undir samninginn að hann stangaðist á við stjórnarskrána sjálfa í fjölda liða. Heldur þú svo að það batni þegar við tökum fyrir allan 10 M háan A4 pakkann frá bandalaginu? Þetta er einn helsti akkilesarhællinn í þessu, svo ekki sé minnst á klásúlur í Rómarsáttmálanum, sem kveða á um að allir fiskistofnar bandalagslandanna sé sameign bandalagsins.  Af hverju viljið þið selja okkar litla land í hendur þessa?  Hverjar eru væntingar ykkar og markmið? Stöðugleiki? Er vert að fórna sjálfstæðinu fyrir slík loftkennd norm. Nú er Evran í frjálsu falli gagnvart dollar, háværar deilur um stjórnarskrá, hugmyndir um afsögn þjóða. Óeining. Hvaða stöðugleiki má það vera.

[Sigurður Hrellir, 13.11.2008 kl. 09:59]

Ég hef að vísu aldrei ímyndað mér að ESB sé himnaríki á jörð eða til fullkomið á nokkurn hátt. Það sem er virðingarvert er upphaflega hugsjónin með sambandinu, að ríki Evrópu myndu ekki heyja styrjaldir sín á milli heldur leysa sín deilumál innan ríkjasambandsins. Það hefur gengið vel hingað  til.

Skrifræðið er mikið og miðstýring sömuleiðis en sjálfur tel ég betra að vera meðlimur í klúbbnum heldur en utan gátta. Það finnst mér einfaldlega hafa sýnt sig á undanförnum vikum og mánuðum. Að halda það að hér sé hægt að bjóða Rússum eða Kínverjum einhverja aðstöðu gegn fjárhagslegum stuðningi eins og sumir stinga upp á finnst mér öllu verri kostur. Auk þess myndi það kalla á mjög drastísk viðbrögð frá öllum helstu viðskiptalöndum okkar.