Steingrímur verður að víkja!

Steingrímur J. er samur við sig. Hann vill taka upp myntsamstarf við Noreg þó svo að Stoltenberg forsætisráðherra hafi slegið þá hugmynd út af borðinu. Líkt og Hjörleifur Guttormsson og Ragnar Arnalds er hann andsetinn af ranghugmyndum um ESB og vill ekki hlusta á tvo þriðju hluta stuðningsmanna VG sem kalla eftir aðildarviðræðum og Evruvæðingu í framhaldi af því. Trúlega mun hann ásamt Guðna Ágústssyni og fleiri stjórnmálaleiðtogum þurfa að víkja fyrst hann skynjar ekki vilja kjósenda.

 

Til hvers skyldum við að púkka upp á stjórnmálamenn sem vilja stöðugt hafa vit fyrir okkur? Kýs maður ekki fólk og flokka sem maður á hugmyndafræðilega samleið með? 

 

Ef VG mannaði sig upp í að breyta um stefnu í Evrópumálum myndi ég hugsanlega kjósa þá í vor. Að öðrum kosti tel ég þá vera talsmenn áframhaldandi einangrunarhyggju og efnahagslegs volæðis. Vonandi verða samt aðrir og betri möguleikar í boði.

 

Ég vil sjá Guðfríði Lilju í framvarðasveit VG og Láru Hönnu inn á þing!

Vill að kosið verði í vor

Athugasemdir

[Jóhannes Ragnarsson, 2.11.2008 kl. 14:07]

Er alveg á hreinu, að þú sjálfur sért ekki andsetinn ranghugmyndum um ESB, Steingrím J. og Ragnar Arndalds?

[Sigurður Hrellir, 2.11.2008 kl. 14:14]

Ég hef sjálfur haft nokkrar efasemdir um ESB. Ég mætti fyrir mörgum árum á fund hjá VG þar sem Ragnar Arnalds talaði um hugsanlega aðild. Hann taldi upp fjölmarga ókosti við að ganga þar inn en ekki einn einasta kost. Ég spurði hann að því hvort að hann sæi virkilega enga kosti við mögulega aðild Íslands. Hann sagðist enga kosti geta komið auga á. Ef þetta er ekki að vera andsetinn, þá hvað?

[Gunnlaugur Ingvarsson (IP-tala skráð) 2.11.2008 kl. 14:18]

Heyrðu þó þú óskir þess að þetta sé svona þá er þetta alls ekki svona.

Stoltenberg sagði aldrei að myntsamstarf við Íslendinga kæmi ekki til greina. Hann sagði að sér fynndist ekki koma til greina að Íslendingar tækju upp Norsku krónuna bara sisvona. Það þýðir alls ekki það að hann hafi neitað myntsamstarfi við Íslendinga. Síður en svo þá hefur fullt af málsmetandi Norskum stjórnmálamönnum að fyrra bragði talað um að myntsamstarf við Íslendinga kæmi mjög vel til greina. Þetta er alls ekkert sami hluturinn þó þið í ESB trúiboðinu á Íslandi kjósið að túlka það svona.  Ykkur sést ekki fyrir í trúboðinu. Nú er öllum meðulum beytt, þ.m.t. rangtúlkunum og lygum. Tilgangurinn helgar meðalið.  Reynt er með öllum brögðum að þjösna Íslandi inní þetta Bandalag, sama hvað það kostar og um að gera að gera það núna meðan þjóðin er hálflömuð og hrædd, því henni gæti snúist hugur þegar aðeins kyrrist um. Vonandi ber fólk gæfu til að sjá í gegnum þennan þjóðhættulega áróður og lýðskrum Samfylkingarinnar. Það þjónar alls ekki hagsmundum Íslendinga, hvorki til lengri eða skemmri tíma að ganga í þetta Bandalag. Ég bý sjálfur í Efnahagsbandalagsríkinu Spáni og hér er efnahagsóveðrið skollið á með gjaldþrotum banka og fjármálastofnanna. Verðhruni á fasteignamakaðnum og algjöru frosti þar. Fyrirtæki missa fótana og fara á hausinn og fólk missir atvinnuna. Fyrir var atvinnujleysið í kringum 10 til 15 % en stefnir í að fara í 20 til 30%. Vöruverð hækkar rosalega og verðbólgan heldur innreið sína af fullu afli. Þetta skeður hér í EVRU og Evrópusambandsríkinu Spáni. Ég held líka að þó svo dífan hafi nú verið ansi kröpp hjá ykkur uppá Íslandi núna, þá líður ekki á löngu áður en þið farið aftur að sigla uppá við. Þá verður ástandið hér enn á leiðinni niður og á eftir að vara miklu lengur heldur enn nokkurn tímann á Íslandi. Þannig að í Guðs bænum Íslendingar flýtið ykkur hægt og náiði áttum áður en að farið er inní Evrópusambandið í einhverjum flumbrugangi. Sjálfstæði þjóðarinnar og fullveldi er meira virði en það að ætla að glata því svona.

Lifi frjálst og fullvalda Ísland.  

[Sigurður Hrellir, 2.11.2008 kl. 14:29]

Gunnlaugur, ég þekki sæmilega til á Spáni. Kreppan geysar þar eins og víða í Evrópu. Þar hefur hins vegar viðgengist mjög mikil spilling í byggingabransanum. Allt of mikið var byggt, oft á stöðum við ströndina þar sem ekki mátti byggja. Margir ráðamenn hafa verið dæmdir fyrir mútuþægni. Nú þegar farið er að taka á þessum málum kemur óhreint mjöl upp úr pokunum.

Af hverju skrifar þú ekki líka um alla þá miklu uppbyggingu sem hefur átt sér stað á Spáni síðan þeir gengu inn í ESB? Gífurlegir fjármunir hafa verið lagðir í samgöngukerfi og ýmsa uppbyggingu, t.d. til að viðhalda menningarverðmætum sem voru í algjörri niðurníðslu. Finnst þér ekki að Íslendingar eigi skilið betri samgöngur? Raflestakerfi? Bundið slitlag á helstu vegum? Af hverju einblínir þú á gallana? Finnst þér virkilega Spánn ekki vera frjálst og fullvalda ríki? 

[Gunnar (IP-tala skráð) 2.11.2008 kl. 15:15]

Gunnlaugur hlýtur að búa yfir mikilli skyggnigáfu að geta sagt til um hversu lengi kreppan stendur yfir bæði á íslandi og á spáni.. Það er ómögulegt að segja til um hversu lengi þetta stendur yfir hérna á íslandi og allar spádómstilraunir um þetta verða aldrei annað en skot útí loftið...

[Sveinn Einarsson (IP-tala skráð) 2.11.2008 kl. 15:53]

Sigurður. Við hér á Íslandi hefðum einnig getað haft betri samgöngur ef við hefðum forgangsraðað hlutina betur. Við hefðum t.d. getað minnkað stóriðjuna, við hefðum getað sleppt allri einkavæðinguni sem hefur átt sér stað og með því hefði ríkissjóður staðið betur en hann er í dag. Mér finnst það léileg afsökun að ganga í ESB vegna þess að þeir eiga að bjarga samgöngukerfinu. Við getum gert það sjálf. Takk fyrir.

[Máni Ragnar Svansson, 2.11.2008 kl. 16:23]

Spánn er frjálst og fullvalda ríki....punktur........Það er einsog við eigum að fara að afhenda fornbókmenntirnar og Árnastofnun verði staðsett í Brussel ef við göngum í EB.  Förum að tala útlensku og glötum Sjálfstæði(sflokknum) ?  Eru ekki með EES samningnum þegar 80% reglugerða EB komnar til framkvæmda hér.  Auðvitað átti þetta að koma til miklu fyrr, strax í kjölfar EES samningsins, fyrir síðustu kosningar og ennþá fyrr, þá átti að skoða alvarlega inngöngu í EB, allavega að fara í aðildarviðræður, svo menn sæu skýrt hvað í þessu fælist, en hér er ekkert gert, nema þegar í óefni er komið.  Hér hefur engin alvöru umræða um EB átt sér stað, nema innan Samfylkingarinnar.  Menn töluðu um að við misstum yfirráðin yfir fisknum í sjónum, við inngöngu í EB, en afhentu svo á sama tíma innlendum kvótakóngum eignarhaldið og svo þurfum við að kaupa þetta alltsaman aftur ???  Pólitík er ekki trúarbrögð, þó margt sé þar skylt.  Ég krefst rökstuðnings með og á móti, en burt með upphrópanir.  Auðvitað fylgja þessu einhverjir gallar, en ef kostirnir eru yfirgnæfandi er ég samþykkur, en einsog staðan er núna, áður en aðildarviðræður hafa átt sér stað, veit ég ekki ennþá í hverju þetta felst nákvæmlega.  Ég vil allavega burt með verðtryggingu af lánum og svipaða vexti og í Evrópu, helst eins lága og á Kanaríeyjum, sem eru held ég þeir lægstu í Evrópu, í kringum 3%.  Ég vil ekki þurfa að borga og borga og borga endalaust í mat og húsnæði.  Þetta leysir kannski ekki vandamálin nákvæmlega í dag, en til framtíðar og framtíðin er í dag.

[Sigurður Hrellir, 2.11.2008 kl. 17:51]

Sveinn, ég get vel fallist á það að við hefðum getað forgangsraðað betur hér og haft mun betri samgöngur heldur en raunin er í dag. Ég hefði t.d. fjárfest fyrir peningana sem fengust við sölu ríkisfyrirtækja þannig að samgöngumál væru í betra lagi, bæði vegir og almenningssamgöngur.

Þetta er hins vegar miklu flóknara dæmi en svo. Það sem ég og margir aðrir hafa kallað eftir er að samningsmarkmið séu skilgreind svo að hægt sé að láta reyna á aðildarviðræður. Það má aldrei gefa sér niðurstöður úr slíkum viðræðum fyrirfram. Nú liggur okkur hins vegar mikið á.

Við stöndum frammi fyrir því nú að vera skuldug þjóð á næstu árum og líklega verður bið á því að hægt sé að leggja út í kostnaðarsamar samgönguframkvæmdir nema með aðkomu ESB. Hagkerfið er í molum og raunar hefur aldrei verið neinn stöðugleiki hér með íslensku krónuna. Við þufum á hjálp að halda við að endurbyggja nýja atvinnuvegi því að stóriðjustefnan er einfaldlega ekki raunhæfur kostur lengur. Það getur vel verið að ég sé nokkuð bjartsýnn um þann samning sem Ísland gæti náð við ESB en það mun aldrei koma í ljós ef Steingrímur og félagar fá að ráða för.