Bréf til Evrópu

Jónas Haralz sagði í Fréttablaðinu í gær að Ísland hefði átt að ganga í EBS árið 1992. Þess í stað urðum við hluti af EES og tókum upp 75% af regluverkinu án þess að vera með í klúbbnum.  Stjórnmálamönnum þótti víst nauðsynlegt að einangra landið enn um sinn.

Nú, 16 árum síðar getum við nagað okkur í handarbökin fyrir að hafa ekki losað okkur við krónuna ásamt íslenska seðlabankanum og þeim sem þar hreykir sér hæst. Það er allavega deginum ljósara að töluvert önnur staða væri uppi hér á landi.

Það er varla hægt að álasa stjórnmálamönnum fyrir að hafa ekki árið 1992 séð fyrir hrun bankanna 2008. Hins vegar ættu þeir að finna sér annað starf nú þegar ef þeir ætla áfram að þrjóskast við og neita að hlusta á vilja fólksins sem þeir starfa í umboði fyrir.

Að sækja um aðild að ESB er afar einfalt mál. Einungis eitt bréf þarf að senda til ráðherraráðsins og óska eftir því að viðræður hefjist. 6-12 mánuðum síðar gætum við verið komin þar inn. En á meðan fulltrúar flestra íslenskra stjórnmálaflokka loka augum og eyrum er ekki við því að búast.

Stuðningur við ESB-aðild og evru eykst

Athugasemdir

[Hans Haraldsson (IP-tala skráð) 27.10.2008 kl. 08:39]

Það væri vissulega einhver önnur staða hér á landi ef við hefðum gengið í ESB árið 1992 en er einhver ástæða til þess að halda að hún væri frekar betri en verri? Væru millifærslur frá útlöndum ekki jafn stopp t.d?

[Sigurður Hrellir, 27.10.2008 kl. 08:44]

Millifærslur frá útlöndum væru örugglega ekki stopp af þeirri einföldu ástæðu að hér væri sami gjaldmiðill og í flestum ESB löndum.

[Hans Haraldsson (IP-tala skráð) 27.10.2008 kl. 08:54]

Tvær helstu ástæðurnar sem erlendir bankar/viðskiptaaðilar gefa upp fyrir að neita að millifæra eru 1) ótti við að færslan festist í þrotabúi (vita ekki að bönkunum er haldið í rekstri). 2) Vegna þess að sumir telja (ranglega) að það sé óheimilt vegna beitingu hryðjuverkalagana. Hvorug þessara ástæðna tengist krónunni.

Bankar hafa þó neitað að leggja inn á Íslenska reikninga þar sem þá skortir gengi á krónunni en það er ekki fyrirstaða ef lagt er inn á gjaldeyrisreikninga. 

[Skaz, 27.10.2008 kl. 10:14]

Hans ég veit nú bara um eitt gott dæmi þar sem nokkrir bankar neituðu að skipta krónum eða taka við millifærslu frá Íslandi í krónum. Spurðu hvort það væri ekki hægt að breyta þessu í evrur á Íslandi og færa þannig.

Þannig að krónan er víst búin að vera bein fyrirstaða í viðskiptum.

[Hans Haraldsson (IP-tala skráð) 27.10.2008 kl. 10:35]

Ég nefndi millifærslur fráútlöndum sem dæmi um viðskiptahindrun sem ekki er krónunni að kenna.

Ég veit það vel að krónan er næsta verðlaus þessar vikurnar. Ein af ástæðunum fyrir því að það myndast ekki gengi er einmitt að það berst ekki gjaldeyrir til landsins.

[Páll Geir Bjarnason, 27.10.2008 kl. 13:22]

Hans, þetta er allt þvæla hjá þér. Ástandið hérna væri talsvert betra ef við hefðum hunskast í ESB þegar tími gafst til. Auðvitað hafa aðrir þættir haft áhrif en um þennan verður ekki deilt lengur. Annað er afneitun á háu stigi.

[Vilhjálmur Andri Kjartansson (IP-tala skráð) 27.10.2008 kl. 13:42]

Hvar færð þú út væninn þessi 75 prósent? Skrifstofa EFTA gerði útekt á þessu fyrir okkur 2005 og þá kom í ljós að við tökum upp rúm 6,5 prósent af  regluverkinu.

[Sigurður Hrellir, 27.10.2008 kl. 15:12]

Vilhjálmur, þetta hefur víða mátt lesa í fjölmiðlum að undanförnu, t.d. hér haft eftir Olli Rehn. Hvort að um of háa tölu er að ræða skal ég ekki dæma. Hins vegar verður að álíta stækkunarstjóra ESB nokkuð kunnugan mann á þessu sviði. Hefur lagadeild HÍ gert einhverja athugun á þessu nýlega?

Ég las síðasta bloggið þitt þar sem þú segist vera "talsmaður þess að hver og einn einstaklingur beri ábyrgð á sjálfum sér og sínum skuldbindingum". Sjálfur get ég vel tekið undir þessi orð en hlýt þó að gera þá kröfu að búa við svipaðan stöðugleika og aðrar vestrænar þjóðir. Hér hafa fyrirtæki og almenningur verið þrautpínd svo lengi sem flestir menn muna vegna gjaldmiðilsins og efnahags(ó)stjórnar.

Þú virðist einnig hafa mikið dálæti á BNA umfram ESB og mátt svosem hafa þína skoðun á því fyrir mér. Hins vegar held ég að þú eigir mikla vinnu fyrir höndum að sannfæra þjóðina um að sækja um aðild að BNA með öllum þeim skrípaleik sem þar viðgengst. Svo veit ég heldur ekki til að það standi okkur til boða.

[Sigurður Hrellir, 27.10.2008 kl. 15:27]

Svo langar mig að bæta því við að enn ein ástæðan til að ganga inn í ESB er að losa um hið mikla klíkuveldi sem sífellt ræður ríkjum hér á Íslandi og hefur fyrst og fremst hugsað um sinn eigin hag. Ég geri t.d. varla ráð fyrir að hinn "ungi og efnilegi" Vilhjálmur hafi fengið embætti sem formaður Innkauparáðs Reykjavíkurborgar algjörlega af eigin verðleikum...