Og hvað með almenning?

Það virðist ekki vefjast fyrir bönkunum að færa niður höfuðstól lána til fyrirtækja, ólíkt einstaklingum sem ekki eru í vildarvinaklúbbi stjórnmálamanna og bankastjóra. Almenningur hefur líka verið gerður ábyrgur fyrir lánum sínum langt út yfir gröf og dauða og er gert að taka á sig allar afleiðingar óráðsíu í bankakerfinu, glæpsamlegum stöðutökum gegn krónunni, gagnlausum eftirlitsstofnunum og siðlausrar einkavinavæðingar.

Það kemur betur og betur í ljós að það kemur út á eitt hvort að horft er til vinstri eða hægri í stjórnmálum á Íslandi. Skjaldborgin skal reist utan um fjármálastofnanir og fjármagnseigendur hvað sem tautar og raular. "Norræna velferðarstjórnin" olli meira að segja sænska efnahagsráðgjafanum gífurlegum vonbrigðum.

En hvar eru Neytendasamtökin og ýmis önnur hagsmunasamtök almennings? ASÍ og verkalýðsfélögin? Getur almenningur e.t.v. sjálfum sér um kennt?

Höfuðstóll fyrirtækjalána gæti lækkað verulega

Mannréttindi

Þetta er gott mál hjá Lilju og algjör mannréttindi að fólk sé ekki elt uppi út yfir gröf og dauða vegna stökkbreyttra lána. Engin venjuleg manneskja fékk lán án þess að traust veð lægi þar að baki, einungis sjálftökulið úr hópi stjórnmálamanna og vildarvina bankanna.

Í annarri frétt í dag má sjá að mannréttindi eru lítils metin á Íslandi og einkahlutafélög fá betri og skjótari úrlausn  en almenningur.

Nú kemur í ljós hvort að svokölluð vinstri stjórn stendur með Lilju Mósesdóttur og fólkinu í landinu eða hvort ríkisstjórnin ætlar enn að styrkja skjaldborgina sem hún hefur reist um fjármálafyrirtækin og fjármagnseigendur.

Tengill á fréttina er hér.

Ekkert fyndið lengur

Borgarfulltrúar fá álagsgreiðslur fyrir að vinna vinnuna sína!?! Þetta er hreinlega ekki fyndið. Það hefur sýnt sig að einungis er um hlutastarf að ræða þar sem að borgarfulltrúar hafa samtímis getað setið á Alþingi eða jafnvel á ráðherrastól, nú eða stundað nám við erlenda háskóla. Svo sitja þeir í stjórnum almenningsfyrirtækja (væntanlega á venjulegum vinnutíma) og fá aukalega greitt fyrir það og svo fá þeir vitaskuld ýmsan tilfallandi kostnað við hitt og þetta greiddan sem almenningur þarf að kreista af ört minnkandi launum sínum eftir skatta.

Allavega er það á hreinu að núverandi ástand er móðgun við heilbrigða skynsemi. Það er mikill lýðræðishalli fólginn í því að kjósa of fáa fulltrúa í sveitarstjórnir og leyfa þeim svo sjálfum að vasast með skipanir í nefndir og ráð. Hvers vegna leyfum við fjórflokknum endalaust að ráðskast með öll okkar mál?

Ég vil hreinlega ganga svo langt að sameina sveitarfélögin á höfuðborgarsvæðinu í eitt eða tvö og fjölga í leiðinni lýðræðislega kjörnum fulltrúum. Í dag eru þeir 70 samtals í 8 sveitarfélögum, sjá hér. Það mætti hæglega ná fram töluverðum sparnaði í leiðinni með því að skilgreina setur í bæjarstjórnum sem hlutastarf eða greiða fyrir hvern fund fyrir sig og sleppa þessum fjölmörgu bitlingum.

Lykilatriðið er að fá sem flesta að ákvarðanatökum og auka lýðræði, gegnsæi og ábyrgð borgaranna. Það er töluvert af fólki sem notar frítíma sinn án nokkurrar þóknunar í að reyna að hafa áhrif í gegn um hverfasamtök og hagsmunasamtök en með mjög takmörkuðum árangri, því miður.

Hversu lengi lætur fólk þetta svínarí viðgangast?

Allt að 900 þúsund á mánuði

Skref í rétta átt

Ég skrifaði ágætis færslu um stjórnlagaþing í morgun, sjá hér. Vonandi verður Þjóðfundurinn til þess að fá fólk til að sjá í gegn um afleitt frumvarp ríkisstjórnarinnar um ráðgefandi stjórnlagaþing í boði Alþingis og stjórnmálaflokkanna.

Sjö milljónir í Þjóðfund

Rán um hábjartan dag?

Nú liggur fyrir frumvarp um stjórnlagaþing. Kjósa á 25-31 fulltrúa persónukjöri samhliða sveitastjórnum í vor og eiga fulltrúarnir að þiggja þingfararkaup á tímabilinu.

En bíðum aðeins við. Hverjir munu veljast á fyrirhugað stjórnlagaþing? Verða það fulltrúar almennings eða fulltrúar stjórnmálaflokkanna? Verður þetta kannski eins konar "hall of fame" eða samansafn þjóðþekktra einstaklinga? Veljast ef til vill e-s konar forréttindahópar á þingið eða fólk sem á undanförnum árum hefur notið ríkulegrar fyrirgreiðslu umfram aðra? Efnafólk hefur augljóslega forskot ef leyfa á auglýsingar í tengslum við kosninguna.

Höfum eitt á hreinu: Stjórnlagaþing á að vera þing þjóðarinnar sjálfrar þar sem nauðsynlegt er að sitji þverskurður samfélagsins alls. Það er algjörlega vonlaust að ímynda sér að það takist með því fyrirkomulagi sem ríkisstjórnin leggur upp með. Fyrirfram dauðadæmt. Ekki bætir úr skák að mikil tortryggni ríkir gagnvart stjórnvöldum og það eitt að einhverjir útsendarar flokkanna hreiðri um sig innan um aðra fulltrúa á stjórnlagaþingi er óbærileg tilhugsun. Flokkarnir hafa kosningamaskínur og ítök innan fjölmiðla sem flestir aðrir hafa ekki.

Stjórnlagaþing á að velja af handahófi úr þjóðskránni. Þar eiga að sitja mjög margir fulltrúar, því fleiri, því betra. Það á alls ekki að bera fé á þetta fólk því að um þegnskylduvinnu er að ræða og hún verður að vera unnin með glöðu geði af fólkinu fyrir fólkið. Greiða þyrfti ferðakostnað og uppihald fyrir fólk af landsbyggðinni og þá sem búsettir eru erlendis.

Hægt væri að hugsa sér útfærslu sem byggist á mjög stóru úrtaki úr þjóðskrá, a.a. 1% til að tryggja fjölbreytileika. Þetta fólk myndi hittast 3-4 helgar með nokkurra mánaða millibili. 1% af þessum hópi (30 manns á hóflegum launum)  hefði mun stærra hlutverki að gegna og myndi vinna að útfærslu mála á milli þess sem stóra þingið hittist. Svo mætti jafnvel hugsa sér að kosnir yrðu 3-5 einstaklingar til að leiða þingið og að ráðnir séu nokkrir sérfræðingar á faglegum forsendum til ráðgjafar og upplýsingaröflunar.

Hér er einfaldlega á ferðinni spurning um framtíð þjóðarinnar í þessu landi. Viljum við sjá réttlátt þjóðfélag þar sem mannréttindi eru sett framar forréttindum? Viljum við setja alla við sama borð þegar trúmál eru annars vegar? Viljum við að faglegar forsendur ráði því hverjir veljast til stjórnunarstarfa eða fjölskyldu- og vinatengsl? Hvað með auðlindirnar, nýtingu þeirra og eignarétt? Hvernig stjórnkerfi viljum við? Viljum við forsetaembættið áfram og hvert á að vera valdsvið þjóðhöfðingjans? Viljum við kannski beint lýðræði þar sem almenningur getur alltaf gripið inn í ákvarðanatökur?

Ef frumvarp ríkisstjórnarinnar nær fram að ganga eru töluverð rök fyrir því að stjórnlagaþingið endurspegli ekki raunverulegan vilja þjóðarinnar. Þannig gæti Alþingi á endanum hagað málum eftir sínu eigin höfði og jafnvel breytt niðurstöðum stjórnlagaþingsins eftir eigin geðþótta. Stjórnlagaþing í boði Alþingis? Persónukjör í boði stjórnmálaflokkanna? Fjölmiðlar í boði auðmanna? Ætlum við aldrei að læra neitt af reynslunni?

Verk að vinna

Gott mál - til hamingju VG! En Bergur, þú hefur verk að vinna!

Vonandi heldur Bergur þingmönnum VG og Samfylkingar við efnið í náttúruvernd og umhverfismálum. Það er aumkunarvert að sjá hvernig sumir þingmenn og ráðherrar VG hafa lúffað í grænu málunum. Fáir bjuggust reyndar við öðru af Samfylkingunni. Nú síðast auknar álögur á grænmetisbændur á meðan að mengandi erlend stóriðja fær allt á tombóluverði.

Ef þessi ríkisstjórn tekur sér ekki tak í að standa vörð um náttúru landsins hljóta náttúruverndarsinnar að taka til sinna eigin ráða.

Nýr framkvæmdastjóri þingflokks VG

Er það ekki brot á lögum að veita ólögleg lán?

Ég sé mig í anda hafa sótt um lán eins og þessi hjá Glitni haustið 2007. Það hefði verið horft á mann eins og hvern annan vanvita.

Nú er það svo að einhver forréttindaklúbbur fékk milljónalán út á börnin sín því að varla hafa börnin sjálf rekið það mjög stíft að taka margar milljónir að láni til þess eins að eyða þeim í eitthvað álíka óskemmtilegt og stofnfjárhluti í Byr. Þetta hlýtur að flokkast undir misnotkun á börnum.

Ég geri þá kröfu að fá upplýsingar um það hvaða fólk þetta er fyrst að skuldirnar á að fella niður. Sömuleiðis geri ég þá kröfu að fá að vita hvaða snillingar í Glitni samþykktu þessa lánastarfsemi sem hlýtur að vera eitthvað meira en lítið bogið við.

Sagt var í fréttum á RÚV á lánin væru ólögmæt og þess vegna hefði verið ákveðið að falla frá því innheimta þau. Hér er komið fordæmi fyrir því að fella niður gengistryggð lán sem klárlega eru ólögmæt samkvæmt laganna hljóðan. Eini munurinn er að það er venjulegt fólk sem tók gengistryggðu lánin, ekki "fyrirmyndarforeldrar" úr kúlulánaklíkunni.

Hyggst ekki innheimta lánin

Er í lagi að slökkva aðeins á reykvélinni?

Ég bendi á bloggfærslu mína frá því fyrr í dag þar sem vísað er til World Class.

Íhugar mál gegn Straumi Burðarás

Reykvélin á fullu

Fyrir ári síðan var efnahagskerfið hrunið og farið að bera á reglulegum mótmælum á Austurvelli. "Raddir fólksins" stóðu fyrir ræðuhöldum á laugardögum þar sem m.a. háværar kröfur voru uppi um nýtt gildismat, nýtt lýðveldi, faglega stjórnsýslu og réttláta málsmeðferð í tengslum við hrunið.

Í október 2009 er lítið rætt um nýtt lýðveldi og nýja stjórnarskrá. Engin fjárveiting er á fjárlögum til stjórnlagaþings þó svo að ríkisstjórnin sé með frumvarp í mýflugumynd til að þykjast hafa áhuga á málinu. Að sjálfsögðu ætla stjórnmálaflokkarnir hins vegar að reisa skjaldborg um eigin hag og myndu síst af öllu samþykkja stjórnlagaþing þar sem raunverulegum fulltrúum almennings væri falið að semja nýja stjórnarskrá með hagsmuni þjóðarinnar að leiðarljósi.

Í október 2009 hefur enginn verið dæmdur fyrir þátt sinn í hruninu. Engar fréttir hafa borist af því að eignir hafi verið frystar, engir hafa verið úrskurðaðir í gæsluvarðhald - þvert á móti, flestir þeir líklegustu eru enn á fullu í viðskiptum eða á kafi í stjórnmálum.  Vissulega óttast sumir skýrslu rannsóknarnefndarinnar en sá ótti er ástæðulaus því að skýrslan sú mun í framtíðinni fyrst og fremst verða viðfangsefni sagnfræðinga, en ekki lögfræðinga og dómara.

Í október 2009 er hins vegar enn verið að nota bankaleynd til að hjúpa alls kyns gjörnina leyndarhjúpi og veita ýmsum aðilum sérstaka fyrirgreiðslu. Munurinn er bara sá að bankarnir eru nú á forsjá ríkisins og skilanefnda sem geta ráðið ráðum sínum án þess að gagnsæi eða upplýsingaskylda sé þrándur í götu. Það er ekki einu sinni svo gott að hluthafar eins og Vilhjálmur Bjarnason geti haldið uppi beittri gagnrýni.

Nokkur nýleg dæmi sem mbl.is hefur að mestu kosið að láta hjá liggja að fjalla um:

Afskriftir lána til forgangsbarna - hverjir skyldu ábyrgðarmenn þeirra vera? BANKALEYND!

Kennitöluflakk með aðstoð Landsbankans - BANKALEYND!

Nýi upplýsingafulltrúi Landsbankans - FAGLEG RÁÐNING?

Umbunað fyrir innherjaviðskipti - STJÓRNSÝSLAN SÉR UM SÍNA!

Sauðfjárrækt í Arnarnesinu - BANKALEYND!

Bara svo því sé haldið til haga þá er bankaleynd hugsuð til að vernda viðskiptahagsmuni en ekki til að fela siðlaust athæfi forréttindafólks! Það eru bara ekki allir með sömu hagsmunina þegar kemur að bönkunum sjálfum.

Hættum að vera meðvirk og lesum fjölmiðla sem standa undir nafni!

Á flótta undan skilanefndinni

Í gær var haft eftir Ragnari Jörundssyni sveitarstjóra Vesturbyggðar og sérlegum aðdáanda rússneskra fjárfesta að "hann vilji ekki til þess hugsa að féð svelti í hel eða hrapi af klettum í vondum veðrum".

20 manns voru sendir á fjallið í þeim tilgangi að smala hinu villta sauðfé en "björgunin" tókst ekki betur en svo að 5 ferfætlingar hoppuðu fram af klettum frekar en að eiga orð við fjall-skilanefndina.

Það er skrýtið til þess að hugsa að aðkreppt sveitarfélög í fjárþröng skuli hafa efni á svona ævintýramennsku og láti sér slétt standa á sama um almenningsálitið. Eru skilanefndirnar líka farnar að stjórna hver lifir eða deyr?