Stjórnlagaþing verður að fá frið fyrir stjórnmálaflokkunum

Hugmyndir um stjórnlagaþing í þessu stjórnarfrumvarpi eru því miður langt frá því að vera ásættanlegar. Hér fyrir neðan er tilkynning sem "Samtök um lýðræði og almannahag" sendi frá sér og Borgarahreyfingin hefur nú gert að sinni.

 

Kjör til stjórnlagaþings og endurskoðun stjórnarskrár 

Tilkynning frá Samtökum um lýðræði og almannahag 
 

Samtök um lýðræði og almannahag eru samtök fólks sem er fyrst og fremst lýðræðissinnað og krefst þess að Íslandi verði hér eftir stjórnað með hagsmuni almennings í huga.  Samtökin krefjast þess að það fari fram endurskoðun á stjórnarskránni og að sú endurskoðun verði gerð af almenningi og fyrir almenning. 

Samtökin eru óháð stjórnmálaflokkum og berjast fyrir almannahag og lýðræðis- samfélagi sem hafnar forræði og forréttindum stjórnmálaflokka samtímans.  Samtökin telja augljóst að ríkisstjórnir Íslands til langs tíma og stjórnmálaflokkarnir að baki þeim hafi glatað öllum tengslum við raunverulegt líf fólksins í landinu. 

Samtökin telja einnig að allir núverandi stjórnmálaflokkar séu með einum eða öðrum hætti bundnir á klafa sérhagsmuna og/eða hugmyndafræði sem sé andstæð víðtækum almannahagsmunum og að augljóst sé að nánast öll stjórnarandstaða, hverju nafni sem hún nefnist, bíði ætíð og aðeins eftir að komast að nægtaborðinu sjálf. 

Samtökin telja endurskoðaða stjórnarskrá brýnasta mál samtímans og eru sannfærð um að aldrei fyrr hafi verið eins mikil þörf á að endurskoða stjórnarskrána og endurreisa lýðræði á Íslandi, ef landið eigi áfram að teljast til vestrænna lýðræðisríkja. 

Til að hagsmuna almennings verði gætt við endurskoðun stjórnarskrárinnar telja Samtökin grundvallaratriði að sú vinna fari fram á sérstöku stjórnlagaþingi sem verður án beinnar aðkomu stjórnmálaflokka og verði með eftirfarandi hætti: 

• Valið verði á stjórnlagaþing úr röðum almennings samkvæmt hefðbundnu 600 manna úrtaki frá Gallup og einnig verði valdir eins margir til vara og þurfa þykir vegna forfalla, áhugaleysis eða vanhæfis.  Stjórnlagaþingseta verði fullt starf.

 

• Stjórnlagaþingið skal skipulagt og verkinu stýrt af 5 manna sérfræðingahópi með sérþekkingu á stjórnskipunarrétti, mannréttindamálum og lýðræðisumbótum.  Æskilegt er að a.m.k. 2 af hópnum séu erlendir sérfræðingar.

 

• Stjórnlagaþingið skal endurskoða allar greinar stjórnarskrárinnar og hafa til hliðsjónar þá vinnu sem þegar hefur verið unnin í stjórnarskrárnefnd sem og taka við tillögum frá almenningi, jafnt einstaklingum sem hópum.  Fyrri vinnu stjórnarskrárnefndar og aðsendum tillögum skal finna stað ef hægt er, en þó ætíð með almannahag, lýðræði og mannréttindi að leiðarljósi.

 

• Endurskoðun stjórnarskrárinnar skal lokið á 3 mánuðum, drögin send til umsagnar hjá innlendum og erlendum sérfræðingum og tilheyrandi alþjóðastofnunum og að því loknu lögð fram til víðtækrar kynningar í einn mánuð.

 

• Að lokinni kynningu verður ný stjórnarskrá borin undir þjóðaratkvæði.

 

Stjórnlagaþing kosið í haust

Syndaaflausn?

Ég velti því fyrir mér hvort að vinnubrögð Bjarna Harðarsonar séu kjósendum að skapi. Hann hugðist nýta aðstoðarmann sinn á launum hjá ríkinu til að dreifa óhróðri um Valgerði flokkssystur sína. Ekki fór það rétta leið og í framhaldinu snautaði hann af Alþingi með skottið á milli lappanna. Skyldi hann lofa bót og betrun á fundinum á morgun?

Fékk hann ef til vill syndaaflausn hjá sr. Þórhalli?

L-listinn boðar framboð til alþingiskosninga

Tvístígandi þjóð

Það er ótrúleg sveifla meðal þjóðarinnar í stuðningi eða andstöðu við aðild að ESB. Í könnun sem gerð var í október sl. var töluverður meirihluti sem studdi aðild Íslands að sambandinu en nú virðist dæmið hafa snúist við. Hafa ber í huga að við erum enn jafn langt frá því að fá það upp á borðið hvað hugsanleg aðild hefði í för með sér fyrir land og þjóð - endalaust virðist fólk vera tilbúið að þrátta um keisarans skegg.

 

Að mínu mati er það mikið forgangsmál fyrir okkur að hefja aðildarviðræður sem fyrst og samhliða því skoða alla helstu kosti og galla. Eina rökrétta leiðin er að upplýst þjóð fái að skera úr um það í þjóðaratkvæðagreiðslu hvort hún vill ganga til liðs við sambandið eða áfram að eiga sig sjálf.

• Í fyrsta lagi hlýtur öll töf að vera slæm hvað varðar framtíðarsýn í gjaldeyrismálum þjóðarinnar. Erfitt er að taka ákvörðun til framtíðar á meðan að óljóst er um stefnu innan eða utan ESB.
  
• Í öðru lagi teldi ég mikilvægt að klára aðildarviðræður og umræður um þær fyrir 2012 þegar fiskveiðistefna sambandsins verður endurskoðuð.
• Í þriðja lagi er nokkuð ljóst að Íslendingar verða af miklum styrkjum frá sambandinu sem gætu nýst til uppbyggingar á ýmsum sviðum nú þegar að svo mikil þörf er á mannaflsfrekum framkvæmdum, sjá færslu mína hér.
• Í fjórða lagi finnst mér tilvalið að nýta þann mikla áhuga og velvilja Olli Rehn stækkunarstjóra sambandsins okkur til framdráttar. Ekki er líklegt að næsti maður í því embætti verði okkur svo vinveittur.

Ég mun þurfa að sætta mig við úrskurð um þetta mikilvæga mál í þjóðaratkvæðagreiðslu um aðildarsamning. Hins vegar get ég alls ekki sætt mig við að valdamiklir andstæðingar við ESB loki þjóðina áfram inni á biðstofu og hvorki gangi né reki í umræðunni um framtíð landsins.

En eitt virðist alltaf gleymast í þessari tilfinningasömu umræðu hér á landi. Það er að allar 27 þjóðir ESB myndu þurfa að samþykkja umsókn Íslands, hver og ein einasta. Skyldu þær gera það eftir það sem undan er gengið?

Meirihluti andvígur ESB-umsókn

Bréf til fréttastofu RÚV og lögreglustjórans í Rvk.

Góðan dag,

Ég vil gera athugasemd við vinnubrögð fréttastofu RÚV og lögreglunnar í Reykjavík í sambandi við útifundi "Radda fólksins" á Austurvelli.

Í gær kom m.a. eftirfarandi fram í fréttum RÚV:

• "Áhugi á mótmælum virðist þó fara dvínandi hér á landi."
• "Mjög fámennt var á mótmælafundi á Austurvelli klukkan 3 í dag að sögn lögreglu."
• "Að sögn lögreglu var þátttakan einnig lítil í lýðveldisgöngu frá Hlemmi og að Austurvelli fyrir fundinn."

Hér virðast vera settar fram staðhæfingar án þess að fréttamaður frá fjölmiðlinum hafi mætt á staðinn. Orð lögreglunnar eru tekin trúanleg þó svo að margsinnis áður hafi "talning" á hennar vegum verið dregin í efa og kvartað yfir því við fjölmiðla.

Þorleifur Gunnlaugsson borgarfulltrúi var á fundinum að dreifa út blöðum með upplýsingum frá VG. Hann sagði mér eftir fundinn að hann hefði afhent fólki 300 eintök og að fundarmenn hefðu verið mun fleiri, u.þ.b. 500.

Ég vil benda á að það hefur komið fram að kostnaður lögreglunnar vegna mótmæla síðustu vikur og mánuði sé kominn yfir 50 milljónir. Þetta er mikið fé og væntanlega þungur baggi fyrir starfsemi hennar. Lögreglan hefur því beina fjárhagslega hagsmuni af því að draga úr mótmælum eins og hægt er.

Það er algjörlega óásættanlegt að vandaður fjölmiðill eins og RÚV flytji ekki nákvæmari fréttir en þetta og leyfi sér að halda því fram að áhugi á mótmælum virðist fara dvínandi. Ég fullyrði að mun fleiri voru á fundinum í gær en voru þar á fundum tvo laugardaga á undan. Og síðan hvenær telst 500 manna útifundur í Reykjavík vera mjög fámennur?

Ég hringdi inn á fréttastofu RÚV með þessar upplýsingar Þorleifs um kl. 18.20 í gær og var mér lofað að þessu yrði breytt á Netsíðunni. Það loforð hefur ekki enn verið efnt núna á sunnudegi auk þess að ég heyrði í fréttum á miðnætti að sama vitleysan var borin á borð við hlustendur.

Það verður að segjast að fréttastofa Stöðvar 2 / Vísir hafði þó bæði fyrir því að senda myndatökumann á staðinn og var einnig með réttar tölur um þátttöku. Mbl.is var hins vegar með sömu röngu upplýsingar og RÚV.

Með ósk um útskýringar og kröfu um bætt vinnubrögð,

Sigurður Hr. Sigurðsson.

Fáir þátttakendur í mótmælum