Er það ekki brot á lögum að veita ólögleg lán?

Ég sé mig í anda hafa sótt um lán eins og þessi hjá Glitni haustið 2007. Það hefði verið horft á mann eins og hvern annan vanvita.

Nú er það svo að einhver forréttindaklúbbur fékk milljónalán út á börnin sín því að varla hafa börnin sjálf rekið það mjög stíft að taka margar milljónir að láni til þess eins að eyða þeim í eitthvað álíka óskemmtilegt og stofnfjárhluti í Byr. Þetta hlýtur að flokkast undir misnotkun á börnum.

Ég geri þá kröfu að fá upplýsingar um það hvaða fólk þetta er fyrst að skuldirnar á að fella niður. Sömuleiðis geri ég þá kröfu að fá að vita hvaða snillingar í Glitni samþykktu þessa lánastarfsemi sem hlýtur að vera eitthvað meira en lítið bogið við.

Sagt var í fréttum á RÚV á lánin væru ólögmæt og þess vegna hefði verið ákveðið að falla frá því innheimta þau. Hér er komið fordæmi fyrir því að fella niður gengistryggð lán sem klárlega eru ólögmæt samkvæmt laganna hljóðan. Eini munurinn er að það er venjulegt fólk sem tók gengistryggðu lánin, ekki "fyrirmyndarforeldrar" úr kúlulánaklíkunni.

Hyggst ekki innheimta lánin

Er í lagi að slökkva aðeins á reykvélinni?

Ég bendi á bloggfærslu mína frá því fyrr í dag þar sem vísað er til World Class.

Íhugar mál gegn Straumi Burðarás

Reykvélin á fullu

Fyrir ári síðan var efnahagskerfið hrunið og farið að bera á reglulegum mótmælum á Austurvelli. "Raddir fólksins" stóðu fyrir ræðuhöldum á laugardögum þar sem m.a. háværar kröfur voru uppi um nýtt gildismat, nýtt lýðveldi, faglega stjórnsýslu og réttláta málsmeðferð í tengslum við hrunið.

Í október 2009 er lítið rætt um nýtt lýðveldi og nýja stjórnarskrá. Engin fjárveiting er á fjárlögum til stjórnlagaþings þó svo að ríkisstjórnin sé með frumvarp í mýflugumynd til að þykjast hafa áhuga á málinu. Að sjálfsögðu ætla stjórnmálaflokkarnir hins vegar að reisa skjaldborg um eigin hag og myndu síst af öllu samþykkja stjórnlagaþing þar sem raunverulegum fulltrúum almennings væri falið að semja nýja stjórnarskrá með hagsmuni þjóðarinnar að leiðarljósi.

Í október 2009 hefur enginn verið dæmdur fyrir þátt sinn í hruninu. Engar fréttir hafa borist af því að eignir hafi verið frystar, engir hafa verið úrskurðaðir í gæsluvarðhald - þvert á móti, flestir þeir líklegustu eru enn á fullu í viðskiptum eða á kafi í stjórnmálum.  Vissulega óttast sumir skýrslu rannsóknarnefndarinnar en sá ótti er ástæðulaus því að skýrslan sú mun í framtíðinni fyrst og fremst verða viðfangsefni sagnfræðinga, en ekki lögfræðinga og dómara.

Í október 2009 er hins vegar enn verið að nota bankaleynd til að hjúpa alls kyns gjörnina leyndarhjúpi og veita ýmsum aðilum sérstaka fyrirgreiðslu. Munurinn er bara sá að bankarnir eru nú á forsjá ríkisins og skilanefnda sem geta ráðið ráðum sínum án þess að gagnsæi eða upplýsingaskylda sé þrándur í götu. Það er ekki einu sinni svo gott að hluthafar eins og Vilhjálmur Bjarnason geti haldið uppi beittri gagnrýni.

Nokkur nýleg dæmi sem mbl.is hefur að mestu kosið að láta hjá liggja að fjalla um:

Afskriftir lána til forgangsbarna - hverjir skyldu ábyrgðarmenn þeirra vera? BANKALEYND!

Kennitöluflakk með aðstoð Landsbankans - BANKALEYND!

Nýi upplýsingafulltrúi Landsbankans - FAGLEG RÁÐNING?

Umbunað fyrir innherjaviðskipti - STJÓRNSÝSLAN SÉR UM SÍNA!

Sauðfjárrækt í Arnarnesinu - BANKALEYND!

Bara svo því sé haldið til haga þá er bankaleynd hugsuð til að vernda viðskiptahagsmuni en ekki til að fela siðlaust athæfi forréttindafólks! Það eru bara ekki allir með sömu hagsmunina þegar kemur að bönkunum sjálfum.

Hættum að vera meðvirk og lesum fjölmiðla sem standa undir nafni!

Á flótta undan skilanefndinni

Í gær var haft eftir Ragnari Jörundssyni sveitarstjóra Vesturbyggðar og sérlegum aðdáanda rússneskra fjárfesta að "hann vilji ekki til þess hugsa að féð svelti í hel eða hrapi af klettum í vondum veðrum".

20 manns voru sendir á fjallið í þeim tilgangi að smala hinu villta sauðfé en "björgunin" tókst ekki betur en svo að 5 ferfætlingar hoppuðu fram af klettum frekar en að eiga orð við fjall-skilanefndina.

Það er skrýtið til þess að hugsa að aðkreppt sveitarfélög í fjárþröng skuli hafa efni á svona ævintýramennsku og láti sér slétt standa á sama um almenningsálitið. Eru skilanefndirnar líka farnar að stjórna hver lifir eða deyr?

Sauðfé, rússagull og hinn óviðjafnanlegi bæjarstjóri

Í Fréttablaðinu í dag er fjallað um villt sauðfé sem lifað hefur í fjallinu Tálkna milli Patreksfjarðar og Tálknafjarðar frá því um 1950! Haft er eftir bæjarstjóra Vesturbyggðar að "hann vilji ekki til þess hugsa að féð svelti í hel eða hrapi af klettum í vondum veðrum". Þess vegna hefur hann látið gera árásir á kindurnar, síðast árið 2004 þegar 23 sem til náðust voru skotnar og hræin skilin eftir á víðavangi. Nú stendur sem sagt til að beita hefðbundnari "mannúðarsjónarmiðum" og reyna að færa féð til slátrunar.

Ragnar Jörundsson bæjarstjóri hefur sýnt það og sannað að hann á fáa sína líka og fæstir komast með tærnar þar sem hann hefur hælana þegar hann tjáir sig opinberlega. Hann hefur verið mikill baráttumaður fyrir því að olíuhreinsistöð risi í Arnarfirði sem náttúruljósmyndarinn Sigurgeir Sigurjónsson hefur sagt að sé fallegasti fjörður landsins. Á bloggsíðu sinni (sem hefur verið lokað) taldi Ragnar það 99,9% víst að olíuhreinsistöðin risi og líkti henni við mjólkurbú til að gera lítið úr mengunarhættunni. Einnig taldi Ragnar ekki eftir sér að mæta í boð í Rússneska sendiráðinu þar sem hann sannfærðist um að "þarna væri ekkert óhreint í pokahorninu" og að "traustir aðilar" stæðu að áformunum. Samt sem áður viðurkenndi hann fúslega að hann vissi ekki hverjir það væru sem hann teldi svo trausta.

Sauðfé, rússagull og Ragnar Jörundsson. Hljómar þetta ekki traustvekjandi? Íslendingar þurfa varla að kvíða framtíðinni með Samfylkingarmenn eins og Ragnar við völd. Hann mun ekki láta okkur kveljast frekar en rollurnar á Tálkna.

Heimildir hér og hér.

 

Skinheilagur innherjasvikari?

Þá er búið að loka bloggsíðu "Litla landsímamannsins" (Halldórs Egilssonar). Hann lét eitthvað flakka um meint innherjaviðskipti Baldurs Guðlaussonar sem féll ekki í kramið í Hádegismóum.

Um Baldur sem persónu veit ég mest lítið. Hins vegar er það engan veginn boðlegt að mokað sé undir hann 15 mánaða launum aukalega fyrir að hætta sjálfviljugur í starfi og því síður fyrst hann er grunaður um ólögleg innherjaviðskipti. Eru engin takmörk fyrir því hversu mikið á að misbjóða réttlætiskennd venjulegs fólks?

Getur ekki einhver sent mér afrit af færslu Halldórs sem hann kallaði "Skinheilagur innherjasvikari" hér í athugasemd? Það væri mér sársaukalaust ef Mogginn lokaði blogginu mínu enda er hvort eð er búið að eyðileggja samfélagið hér á mbl.is

Baldur lætur af störfum

Til þess eru vítin að varast þau

Gunnar Tómasson ætti að vita hvað hann segir. Hann starfaði í fjöldamörg ár fyrir AGS í Bandaríkjunum og hafði margsinnis varað við því hruni sem peningastefnan leiddi til árið 2008. Varnaðarorð hans náðu ekki eyrum íslenskra stjórnvalda, því er nú verr og miður.

Nú varar Gunnar okkur enn og aftur við aðsteðjandi vanda og segir hvorki meira né minna en að raunveruleg hætta sé á þjóðargjaldþroti. Því miður virðast aðvörunarorð hans ekki berast þangað sem ákvarðanir eru teknar eða skyldu þau vera of stór biti að kyngja fyrir ráðalausa stjórnmálamenn og embættismenn?

Alþingismenn eru eins og óþekkir krakkar að rífast um það hver eigi sterkasta pabbann. Vandamálin eru yfirþyrmandi en þau leysast ekki með innihaldslausu orðagjálfri og ákvarðanafælni. Er til of mikils mælst að hlustað sé á Gunnar og mark tekið á orðum hans?

Krónuskuld í gjaldeyrisskuld við AGS

Utanþingsstjórn, þó fyrr hefði verið

Ef þessar fréttir eru réttar (ég trúi ekki öllu sem Mogginn segir) þá er tími ríkisstjórnarinnar á þrotum. Miklar væntingar voru bundnar við þessa stjórn og því eru vonbrigðin að sama skapi mjög mikil. Hvar eru aðgerðir til bjargar skuldugum heimilum? Hvar er stjórnlagaþingið? Hvar er gagnsæið í stjórnsýslunni? Hvar er réttlætið? Hvar er framtíðarsýn þessa fólks?

Að vísu vil ég hrósa umhverfisráðherranum fyrir að sýna kjark og standa undir nafni. Því miður er ekki það sama hægt að segja um aðra ráðherra.

Nú kemur líklega til kasta Alþingis enn eina ferðina en ef þessi ríkisstjórn fellur í kjölfarið þá mun ég ekki syrgja hana. Það þýðir þó ekkert að bjóða upp á annan kokteil með Sjálfstæðisflokki eða Framsókn. Utanþingsstjórn er það eina sem fólk gæti mögulega sætt sig við og þó fyrr hefði verið!

Icesave-fyrirvörum breytt

Stokkhólmsheilkennið?

Sjálfstæðisflokkurinn var tæp 20 ár við völd. Þeim kafla í stjórnarsögunni lauk með bankahruni og óeirðum. Mottóið var að hygla sér og sínum, nýjasta dæmið er Lambi ehf, "blönduð búfjárrækt" með útflutningi til ónefndra eyja í Karabíska hafinu.

Skyldi það vera afbrigði af Stokkhólmsheilkenninu sem þjakar rúman þriðjung þjóðarinnar sem virðist tilbúin að kyssa vöndinn eina ferðina enn?

Það segir líka sína sögu að stærsta skellinn hljóti sú hreyfing sem stofnuð var til að berjast gegn spillingu í stjórnmálum og beita sér fyrir lýðræðisumbótum.

Ríkisstjórnin rétt héldi velli

Við nánari skoðun...

Ég held að fólk ætti fyrst af öllu að spá í hvort að núverandi fyrirkomulag hafi reynst okkur Reykvíkingum vel. Hér sitja 15 fulltrúar með tæp 7% atkvæða hver. 8 þeirra mynda svokallaðan meirihluta sem öllu ræður á meðan að hinir 7 ráða litlu sem engu. Nefndir og ráð eru skipuð á sama hátt - fulltrúar viðkomandi flokka í sömu hlutföllum. Oft á tíðum sitja þar börn borgarfulltrúanna enda gera þau bara það sem þeim er sagt og fá greitt fyrir.

Væri ekki betra að fá fleiri kjörna fulltrúa að borðinu þannig að hægt væri að tala um raunverulegt íbúalýðræði fremur en það flokksræði sem við höfum búið við? Það yrði örugglega ekki um fulla vinnu að ræða heldur e-s konar stjórnarsetu og greitt samkvæmt því. Um framkvæmdahliðina sæi fólk sem ráðið væri á faglegum forsendum. Heildarkostnaðurinn þyrfti ekki að vera hærri en sparnaður næðist þar sem að minni líkur væru á spillingu.

Ég held að þetta frumvarp sé vel þess virði að það sé skoðað með opnum augum. Í leiðinni teldi ég réttast að skoða sameiningu sveitarfélaga á höfuðborgarasvæðinu þar sem að sameiginlega hagsmuni má víða finna.

Vilja að borgarfulltrúar verði 61